काठमाडौं । संघीय मामिला तथा सामान्य प्रशासन मन्त्रालयले सबै स्थानीय तहहरुलाई पत्राचार गरेर नगर तथा गाउँ सभामा पेश भएको बजेटको विवरण पठाउन आग्रह गरेको छ । सो मन्त्रालयले बुधबार गरेको पत्राचारमा भनिएको छ, ‘‘स्थानीय सरकार सञ्चालन ऐन २०७४को दफा ७१को उपदफा(१) तथा अन्तर—सरकार वित्त व्यवस्थापन ऐन, २०७४को दफा २१को उपदफा (३) ले गाउँ कार्यपालिका र नगर कार्यपालिकाले प्रत्येक वर्ष असार महिनाको १० गते भित्र आगामी आव २०७६–७७ को राजश्व र व्ययको अनुमान सम्बन्धित गाउँ सभा–नगर सभामा पेश गर्नुपर्ने व्यवस्था अनुसार त्यहाँ गाउँपालिका तथा नागरपालिकाको विवरण तीन दिन भित्र पठाउन आग्रह गरिएको छ ।’’

पत्रमा पठाइने विवरणमा आन्तरिक स्रोत, राजस्व बाँडफाँडबाट प्राप्त रकम, सशर्त अनुदान, विशेष तथा समपुरक अनुदान, आन्तरिक, कुल बजेट, खर्च प्रस्ताव लगायतका कुरा खुलाउन समेत आग्रह गरिएको छ । पत्रको बोधार्थ जिल्ला समन्वय समितिको कार्यालय, स्थानीय प्रशासन तथा सामुदायिक विकास कार्यक्रम, प्रादेशिक समन्वय एकाइ तथा सूचना प्रविधि शाखालाई पनि दिइएको छ ।