गाम्बिया । गाम्बियाकी पूर्वब्युटी क्विन २३ वर्षीया फाटोउ जालोले आफू सन् २०१५मा पूर्वराष्ट्रपति यह्या जम्मेहबाट कार्यालयमा नै बलात्कृत भएको आरोप लगाएकी छन् ।
हुमन राइट्स वाच र ट्रायल इन्टरनेसनलको रिपोर्टमा सो कुरा जनाइएको छ । बीबीसीले अहिले इक्वेटोरियल गुयनामा निर्वासनमा बसेका जम्मेहलाई सम्पर्कको प्रयास गरेको जनाएको छ । उनको एपीपीआर पार्टीका प्रवक्ताले भने सो आरोपको खण्डन गरेका छन् । उनले लिखित जवाफमा आरोपको खण्डन गरेका हुन् ।
आरोप लगाउने युवतीले भने आफूले उनीसँग अदालतमा भेट्ने समेत जनाइएकी छन् ।
उनले आफूले सो घटना बिर्सन खोजेको भएपनि नसकेकोले बोल्ने निर्णय गरेको जनाएकी छन् । जम्मेहको २२ वर्षको शासन कालमा भएका मानवअधिकार उल्लंघनका घटनाका बारेमा अहिले त्यहाँ छानबिन प्रक्रिया चलिरहेको छ । जम्मेहले शक्ति छोड्न नचाहेपछि क्षेत्रीय शक्तिहरुले सेना पठाएका थिए । त्यसपछि उनी सन् २०१७मा पद छोडेर निर्वासनमा गएका हुन् ।
जालोले आफूले सन् २०१४मा व्युटी प्याजेन्ट जितेपछि राष्ट्रपतिलाई भेटेको र आफू त्यतिबेला १८ वर्षको भएको जनाएकी छन् । त्यसपछि उनलाई लगातार बोलाउन थालिएको जनाउँदै आफूलाई पूर्वराष्ट्रपतिले थप्पड हानेको र पाखुरामा सुई घोपेको समेत आरोप लगाएकी छन् । साथै उसले यौन ज्यादती गर्ने गरेको समेत आरोप लगाएकी छन् । त्यसपछि आफू छिमेकी मुलुक सेनेगल हुँदै क्यानडा भागेको समेत जनाएकी छन् । (बीबीसी)