दाङ । दाङ र रुपन्देहीमा मंगलबार चट्याङ लागेर छजनाको मृत्यु भएको छ । दाङमा चट्याङ लागेर मृत्यु हुने तीनैजना बालक रहेका छन् ।  मंगलबार साँझ करीब साढे ६ बजेतिर परेको चट्याङले राप्ति गाउँपालिका–३ मौरीघाट निवासी ११ वर्षीय रमीत चौधरी, ११ वर्षकै विनास चौधरी र १३ वर्षीय साजन चौधरीको मृत्यु भएको जिल्ला प्रहरी कार्यालयले जनाएको छ । 

प्रहरी नायब उपरीक्षक विनोदविक्रम शाहका अनुसार  राप्ति–४ स्थित मौरीघाट मावि छेउमा रहेको जामुनको रूखमा चढेका बेला सोही रुखमा परेको चट्याङले तीनै जना बालकको घटनास्थलमै मृत्यु भएको हो ।  साथै सोही रुखमा चढेका विनासका भाई आठ वर्षीय अविनास चौाधरी भने गम्भीर घाइते भएका छन् । उनको स्थानीय स्वास्थ्य संस्थामा उपचार भइरहेको प्रहरीले जनाएको छ ।

त्यस्तै रूपन्देहीका ग्रामीण क्षेत्रमा चट्याङ लागेर मंगलबार बेलुका नै तीन जनाको मृत्यु भएको छ । पानीसँगै परेको चट्याङमा परेर मृत्यु हुनेमा सैनामैना वडा नंं ७, आमीका ६२ वर्षीय चन्द्रबहादुर विक छन् ।  अपराह्न घर नजिकै गाईवस्तु चराउने क्रममा एक्कासी चट्याङ परेर घाइते भएका विकको लुम्बिनी प्रादेशिक अस्पताल बुटवलमा उपचारको क्रममा मृत्यु भएको इलाका प्रहरी कार्यालय सालझण्डीले जनाएको छ ।

त्यसैगरी कञ्चन गाउँपालिका वडा नंं २ वसन्त फुलबारी बस्ने ६० वर्षीय नन्दराम अर्यालको मृत्यु भएको प्रहरीले बताएको छ ।  यता गैडहवा गाउँपालिका–७ वर्गदैया बस्ने राम जीत लोधका २५ वर्षका छोरा भागवतदास लोधको पनि चट्याङ लागि मृत्यु भएको इलाका प्रहरी कार्यालय सूर्य पूराले जनाएको छ ।  गृह मन्त्रालयका अनुसार यो वर्ष चट्याङका कारण ३१ जनाको मृत्यु भइसकेको छभने १३९ जना घाइते भएका छन् । गतवर्ष भने ६८ जनाको मृत्यु भएको थियो कम्तिमा चार सय घाइते भएका थिए ।