काठमाडौं । खानेपानी मन्त्री बिना मगरलाई कालोझण्डा देखाएर विरोध गर्न खोज्ने कांग्रेस कार्यकर्ता र नेकपा कार्यकर्ताबीच कञ्चनपुरको पुनर्वासमा दोहोरो झडप भएको छ ।
पुनर्वास नगरपालिकाको नगर अधिजेशन उद्घाटनका लागि कञ्चनपुर जाँदै गर्दा डोकेबजार क्षेत्रमा झडप भएको हो । प्रतिपक्षी दल नेपाली कांग्रेस कार्यकर्ताले मन्त्री मगरलाई कालो झण्डा देखाउन लाग्दा भएको झडपमा दुवै पक्षका चारजना घाइते भएका छन् । उनीहरुको सेती अञ्चल अस्पताल कैलालीमा उपचार भइरहेको छ ।
नेकपाका कार्यकर्ताको आक्रमणबाट नेपाली कांग्रेस क्षेत्र नम्बर १ का सभापति गोपीप्रसाद उपाध्याय र नेपाली कांग्रेस बेलौरी नगर सचिव विक्रम चन्द घाइते भएका छन् । अहिले अवस्था सामान्य रहेको जिल्ला प्रहरी कार्यालय कञ्चनपुरका डिएसपी ज्ञानबहादुर विष्टले जानकारी दिए ।