काठमाडौं । राष्ट्रिय खेलकुद परिषद् (राखेप)को आयोजना तथा महाकाली स्पोर्टस् सोसाइटीको व्यवस्थापनमा कञ्चनपुरमा जारी प्रधानमन्त्री कप महिला टी–ट्वान्टी राष्ट्रिय क्रिकेट प्रतियोगितामा सुदूरपश्चिम प्रदेश फाइनलमा प्रवेश गरेको छ ।
खेल रद्द हुँदा प्रतियोगिताको नियमअनुसार समूहको विजेताको रुपमा सेमिफाइनल पुगेको सुदूरपश्चिमले फाइनलमा स्थान बनाएको हो । सुदूरपश्चिम समूह ‘ए’ को शीर्ष स्थानमा रहँदै सेमिफाइनल पुगेको थियो ।
महेन्द्रनगरस्थित कभर्डहल क्रिकेट मैदानमा वर्षाले गर्दा मैदान नसुक्दा मंगलबार तय भएको सुदूरपश्चिम प्रदेश र प्रदेश २ बीचको पहिलो सेमिफाइनल खेल रद्द भएको थियो ।
अब सुदूरपश्चिमले फाइनलमा प्रदेश १ र एपीएफ बीचको विजेतासँग बुधवार प्रतिस्पर्धा गर्नेछ ।
असार ४ गतेबाट सुरु भएको प्रतियोगितामा ८ टिमको सहभागिता रहेको छ । जसमा ७ प्रदेश तथा १ विभागीय टिम एपीएफको सहभागिता छ ।
प्रतियोगिताको विजेताले ५ लाख तथा उपविजेताले ३ लाख प्राप्त गर्नेछ । यस्तै प्रतियोगिताको उत्कृष्ट खेलाडीले ३० हजार प्राप्त गर्नेछन् भने विधागत रुपमा उत्कृष्ट हुनेलाई जनही समान १५–१५ हजार नगद प्रदान गरिने छ ।