काठमाडौं । प्रधानमन्त्री केपी शर्मा ओलीका विदेश मामिला सल्लाहकार डा. राजन भट्टराईले इतिहास दोहोर्‍याउने कुचेष्टा भइरहेको जनाएका छन् । 

उनले  सामाजिक सञ्जालमार्फत् यस्तो अभिव्यक्ति सार्वजनिक गरेका हुन् । उनले ट्विटर र फेसबुकमा एक साथ सार्वजनिक गरेको धारणामा भनिएको छ,‘‘बढ्दो जनअपेक्षा, सरकारको कमजोर डेलिभरी प्रणाली, यसबाट उत्पन्न जनअसन्तुष्टिलाई सक्दा व्यवस्था उल्टाउने नभए सरकारका विरुद्ध प्रयोग गर्ने । क—कसलाई के कसो गरी एक ठाउँमा ल्याउन सकिन्छ भनीभित्र बाहिरका शक्तिहरु सक्रिय रहेको अवस्था । इतिहास दोहोर्‍याउने कुचेष्टा ।’’

बाह्रखरीले के कुरालाई संकेत गर्न खोजिएको भनेर डा. भट्टराईसँग जिज्ञासा राख्दा उनले भने,‘‘मैले देखेको कुरा लेखेको हुँ । यहाँभन्दा बढी भन्ने कुरा छैन । यसैबाट बुझ्नुहोला ।’’

प्रधानमन्त्री ओलीले केही दिनअघि गरेको पत्रकार सम्मेलनमा ‘मूर्ति चोर’ भन्नु, सूचना तथा सञ्चार प्रविधि मन्त्रीले आफ्नो नियमित पत्रकार सम्मेलनमा पनि विभिन्न शक्तिकेन्द्रहरुको बारेमा आलोचना गर्नु र अहिले फेरि प्रधानमन्त्रीका विदेश मामिला सल्लाहकारको यस्तो धारणा आउनुले सरकार कुन शक्तिसँग डराउन खोजिरहेको भन्ने प्रश्न जनस्तरमा उठ्न थालेको छ ।

हालै भारतको उत्तर प्रदेशमा मुख्यमन्त्री योगी आदित्यनाथले नेपाल पुनः हिन्दु राज्यतर्फ जान सक्ने खालको धारणा राखेका थिए । उता अमेरिकाले यही बीचमा गएको शुक्रबार निकालेको धार्मिक स्वतन्त्रता सम्बन्धी प्रतिवेदनमा भने भारतीय सत्तारुढ पार्टी भाजपा निकटस्थहरुसँग नेपालका प्रभावशाली नेताहरुले पैसा खाएर हिन्दु राज्य ल्याउन लागेको आरोप लागेको उल्लेख थियो । 

अमेरिकी प्रतिवेदनले पूर्वराजावादीहरुलाई तर्साउने प्रयास गरेको छ भने भारतीय नेताका गतिविधिले भने सरकारी मान्छेहरु तर्सिएको आकलन हुन थालेको छ । 

पछिल्लो अवस्थामा अमेरिका नेपालमा हिन्दु राज्यको विपक्षमा र भारतको सत्तारुढ दल निकट कतिपय शक्ति भने हिन्दु राज्यको पक्षमा देखिएकाले धार्मिक हिसाबले नेपाल दुई खेमाको चेपुवामा पर्ने अवस्था उत्पन्न भएको आकलन हुन थालेको छ ।