दाङ । दाङमा ६ महिनामा १२३ वटा मानव अधिकार हननका घटनाहरू भएका छन् । अनौपचारिक क्षेत्र सेवा केन्द्र (ईन्सेक) को तथ्यांकअनुसार ६ महिना (सन् २०१९ को जनवरीदेखि जुन २३ तारिख) सम्मको अवधिमा यी घटना भएका हुन् । 

जसमा सबैभन्दा बढी बलात्कारका घटना भएका छन् । यो अवधिमा ४२ वटा बलात्कारका घटनाहरू भएका छन् । अघिल्लो एक वर्षमा ५२ वटा बलात्कारका घटना भएका थिए । तर यो वर्षको ६ महिनामा ४२ वटा घटना हुनु बलात्कारका घटनामा उल्लेख्य वृद्धि भएको ईन्सेक दाङका प्रतिनिधि जे एन सागरले जानकारी दिए ।

बलात्कारका घटनाहरूमा प्रहरी, शिक्षक, परिवारका सदस्यहरू हजुरबुवा, भिनाजु, ससुराहरू पिडक भएको उनले बताए । बलात्कारका घटना ४० वटा घटना गैरराज्य पक्षबाट र २ वटा घटना राज्य पक्षबाट भएको छ । बलात्कारबाट पीडितहरूमा २६ जना ५ देखि १७ वर्ष उमेरका भएको प्रतिवेदनमा उल्लेख छ ।

६ महिनाको अवधिमा कुटपिट तथा घरेलु हिंसाका २६ वटा घटना भएका छन् । जसमा १ जना जनप्रतिनिधि पीडित भएका छन् भने एक जना जनप्रतिनिधिले पत्नीलाई घर निकाला गरे । ११ वटा गैरकानुनी हिरासतका घटना भए । जसमा राजनीतिक अस्थाका आधारमा १३ जनालाई गैरकानुनी हिरासतमा राखियो ।

यो अवधिमा एक जना पत्रकारलाई समाचार लेखेकै कारण दुर्व्यवहारको घटना भयो भने ११ वटा दुर्व्यवहारको घटना भयो । ६ महिनाको अवधिमा १० वटा बन्दहड्तालका घटना भएका छन् भने मानव बेचविखनका २, कथित बोक्सीको आरोप २, कथित छुवाछूत १, हत्या र हत्याको प्रयास २, भ्रुण हत्या २, आगजनी १, बहुविवाह १, बालबालिका २, आत्महत्या दुरूत्साहन २ र अन्य ६ गरी १ सय २३ घटना भएका छन् ।

यो अवधिमा १४ वटा राज्य पक्षबाट र १ सय ७ वटा गैरराज्य पक्षबाट र २ वटा अज्ञात पक्षबाट घटना भएका छन् । १ सय २३ घटनामा १ सय २७ जना पीडित भए । ईन्सेकले आइततबार एक कार्यक्रम गरेर पछिल्ले ६ महिनाको अवधिमा भएका मानव अधिकार घटनाको अभिलेख सार्वजनिक गरेको छ ।