काठमाडौं । त्रिवि सेवा आयोगको प्रवेशद्वारमा तालाबन्दी गरेर धर्नामा बसेका नेकपा माओवादी (क्रान्तिकारी) निकट विद्यार्थीमाथि प्रहरीले हस्तक्षेप गरेको छ । प्रवेशद्वारमा तालबन्दी गरेर आयोगका कर्मचारी र पदाधिकारीलाई कार्यालय प्रवेशमा रोक लगाएपछि प्रहरीले उनीहरुमाथि हस्तक्षेप गरेको हो । 

प्रहरीले प्रवेशद्वारमा लगाएको ताला तोड्दै १० जना विद्यार्थीलाई पक्राउ गरेको छ । पक्राउका क्रममा प्रहरीले बल प्रयोग गर्दा विद्यार्थी नेताहरु सुरेश श्रेष्ठ, राम नेपाली र कुमार बर्तौला घाइते भएको बताइएको छ । उनीहरु सबैलाई प्रहरीले कालीमाटी वृत्तमा राखेको छ । 

आयोगले लिएको परीक्षाको नतिजा खारेजीको माग गर्दै एक महिनादेखि आयोगको प्रवेशद्वारमा रिले अनसन बस्दा पनि माग सम्बोधन नभएपछि अखिल क्रान्तिकारीले सोमबार पदाधिकारी र कर्मचारीलाई कार्यालय प्रवेशमा रोक लगाउन तालाबन्दी गरेको थियो । नेकपा माओवादी क्रान्तिकारी निकट विद्यार्थी संगठनले जेठ ६ गतेबाट तीनबुँदे माग राख्दै रिले अनशन सुरु गरेको थियो । मागहरु सम्बोधन नभएपछि कार्यालयको प्रवेशद्वारमा तालाबन्दी गरिएको अखिल क्रान्तिकारीका काठमाडौं संयोजक संघर्ष दाहालले जानकारी दिए । 

उनका अनुसार अखिल क्रान्तिकारीले त्रिवि सेवा आयोग खारेज गर्नुपर्ने, आयोगका भ्रष्ट कर्मचारीलाई कारबाही गर्नुपर्ने र अवैधानिक रुपमा प्रकाशन गरिएको नतिजा खारेज गर्नुपर्ने माग राखेको छ । कर्मचारीको परीक्षामा त्रिवि सेवा आयोगका अध्यक्ष चैतन्य शर्माका आफन्त, अन्य पदाधिकारी र विद्यार्थी नेताका समेत आफन्तको नाम निकालेको भन्दै अख्तियार र सतर्कता केन्द्रमा उजुरी परेको थियो । उजुरी परेपछि अख्तियारले छापा मारेर कागजपत्र नियन्त्रण लिएको छ । कागजपत्र अख्तियारको नियन्त्रणमा भए पनि सेवा आयोगले लिखितमा नाम निकालेका परीक्षार्थीको मौखिक परीक्षा लिएको थियो ।