बिस्केक । भारतका प्रधानमन्त्री नरेन्द्र मोदीले चीनका राष्ट्रपति सी जिनपिङ्गसँगको भेटमा पाकिस्तानलाई आतंकवादबाट मुक्त माहोल बनाउनु जरुरी भएपनि यस्तो नदेखिएको बताएका छन् । संघीय कोअपरेसन अर्गनाइजेसन(एससीओ)को बैठकमा भाग लिन अहिले भारतका प्रधानमन्त्री मोदी र चीनका राष्ट्रपति सी कीर्गिस्तानको बिस्केकमा रहेका छन् । 

मोदीले बिस्केक पुग्नासाथ सबैभन्दा पहिला चीनका राष्ट्रपति सीसँग भेटघाट गरेका थिए । भारतको लोकसभा निर्वाचनमा भाजपाको जीत, जैश ए मोहम्मद प्रमुख मसूद अजहरलाई संयुक्त राष्ट्र संघले विश्वव्यापी आतंककारीको सूचीमा राखेपछि दुई देशका नेताबीच पहिलो पटक भेटघाट भएको हो । भारतका विदेशसचिव विजय गोखलेका अनुसार दुई नेताबीच पाकिस्तानको विषयलाई लिएर संक्षेपमा कुरा भएको थियो । गोखलेका अनुसार भेटघाटका लागि २० मिनेटको समय तय गरिएको भएपनि तोकिएको समयभन्दा लामो समयसम्म दुईपक्षबीच कुराकानी भएको थियो । गोखलेका अनुसार प्रधानमन्त्री मोदीले पाकिस्तानको बारेमा कुराकानी भएको र दुवैपक्ष समश्याको शान्तिपूर्ण समाधानको पक्षमा रहेको जनाएका छन् ।

मोदीले चीनका राष्ट्रपतिसँगको भेटलाई निकै लाभदायक भएको बताएका छन् । एससीओको सम्मेलनमा पाकिस्तानका प्रधानमन्त्री इमरान खान पनि सहभागी छन् । तर, भारतका प्रधानमन्त्री मोदीसँग पाकिस्तानका प्रधानमन्त्री इमरानको भेटघाटको कार्यक्रम तय हुन नसकेको बीबीसीले जनाएको छ ।