काठमाडौं । चाबहिलस्थित ओम अस्पतालमा एक बिरामीको उपचारका क्रममा मृत्यु भएपछि मृतकका आफन्त र अस्पताल आरोप–प्रत्यारोपमा उत्रिएका छन् । आफन्तले डाक्टरको लापरवाहीले मृत्यु भएको दाबी गरेका छन् भने अस्पतालले गम्भीर प्रकृतिको शल्यक्रिया भएकाले बिरामीको मृत्यु हुन पुगेको प्रष्टीकरण दिएको छ ।
सिन्धुपाल्चोकको इन्द्रावती गाउँपालिका–१० कीे ५० वर्षिया रामप्यारी थापा मगरको आज बिहान उपचारको मृत्यु भएको थियो । पित्तथैलीको शल्यक्रिया गर्दा चिकित्सकले लापारवाही गरेको मृतकका आफन्तहरुले बताएका छन् । मृतकका बहिनी ज्वाइँ खड्ग श्रेष्ठका अनुसार गत बिहीबार पेट दुख्ने समस्या देखिएपछि रामप्यारीलाई ओम अस्पतालमा उपचारका लागि ल्याइएको थियो र अस्पतालले पित्तथैलीकोे पत्थरी भएकाले तुरुन्तै शल्यक्रिया गर्नुपर्ने बताएको थियो । शुक्रबार भर्ना गरेर सोही दिन डा. रविन कोइरालाको टोलीले शल्यक्रिया गरेको उनले बताए ।
“डाक्टरको लापरवाहीले गर्दा आइतबार आन्द्राबाट दिसा आउन थालेपछि पुनः अपरेसन गर्नुपर्ने बताइएको थियोे । त्यसपछि आइतबार फेरि अपरेसन भयो,” उनले बाह्रखरीसँग भने, “बिरामीको डेढ मिटर आन्द्रा काम नलाग्ने भएको र काटेर फाल्नुपरेको बताएका थिए । त्यसयता उपचारमा संलग्न चिकित्सकले कहिले बिरामीको अवस्था राम्रो भएको र कहिले नराम्रो भएको बताउँदै आए ।”
आज बिहान ७ बजे अस्पताल प्रशासनले प्रहरी लगाएर ‘तपाईंको बिरामीको मृत्यु भएको’ बताएको बहिनी ज्वाइँ श्रेष्ठले बताए । उनले भने, “अस्पतालको लापरवाहीले हाम्रो आफन्तको मृत्यु भयो । हामी प्रशासनमा जान खोज्दा प्रहरीले रोकेको छ । अस्पतालले यस विषयमा केही प्रतिक्रिया पनि दिएको छैन ।”
अस्पतालका मेडिकल डाइरेक्टर डा. केपी देवकोटाले भने पाठेघरको शल्यक्रिया तीनपटक भएकाले शल्यक्रिया गम्भिर भएको बताएका छन् । बिरामीको दूर प्रविधिबाट पित्तथैलीको शल्यक्रिया गरिएको देवकोटाले बताए । “बिरामीको आन्द्रा धेरै स्थानमा टाँसिएको थियो । लामो समय लगाएर शल्यक्रिया गरियो तर स्वास्थ्यमा सुधार आएन,” उनले भने ।
