एजेन्सी । न्युजिल्याण्डका तीव्र गतिका बलर लकी फर्गुसनले टप अडरका ब्याटसम्यानलाई आउट गर्न सके भारतविरुद्ध जित निकाल्न सहज हुने बताएका छन् । भारत बिहीबार आफ्नो तेस्रो खेलमा शीर्ष स्थानमा रहेको न्युजिल्याण्डविरुद्ध खेल्दैछ ।
खेलअघि तीव्र गतिका बलर फर्गुसनले सुरुआती विकेटपछि भारतीय टोलीलाई दबाबमा राख्नसके जित निकाल्न सहज हुने बताएका हुन् । जारी विश्वकपमा ८ विकेटसहित सर्वाधिक विकेट लिने खेलाडीको शीर्षस्थानमा रहेका फर्गुसनको योजना सुरुआती विकेट नै जितको आधार रहेको छ । उनले भने, "जितका लागि जतिसक्दो छिटो सुरुआती ओपनरलाई आउट गर्नुपर्नेछ । यसो भएन भने पनि विकेटका लागि हरेक बलमा कोशिस गर्नुपर्ने छ ।’
एकदिवसीय क्रिकेट करिअरमा उनको औसत २९ दशमलव ०९ छ । भारतविरुद्धका तीन खेलमा उनको औसत ५९ दशमलव ६७ छ । उनले भारतविरुद्ध बलिङ गर्न चुनौति रहेको बताएका छन् ।
"भारतीय खेलाडी विश्वस्तरीय खेलाडी हुन् । तपाईं उनको सजिलै विकेट लिनसक्नु हुन्न् । तर उनीमाथि दबाब बनाउन सके सानो-सानो मौकामा पनि विकेट लिएर अघि जान सकिन्छ," उनले थपे, "भारतीय टिमले उत्कृष्ट प्रदर्शन गरिरहेको छ र त्यही भएर प्रतियोगिताको उत्कृष्ट टोली हो । तर म इङ्ल्याण्डमा खेल्नका लागि आँतुर छु । किनकी लामो समयदेखि इङ्ल्याण्डमा हाम्रो प्रतिस्पर्धा भएको छैन् ।"
उनले अफगानस्तानविरुद्ध ३७ रन खर्चिएर ४ विकेट लिएका थिए ।
