एजेन्सी । अधिकांश किशोरकिशोरीहरुले आफ्नो पुस्ताले नै जलवायु परिवर्तन, प्लाष्टिक प्रदुषण लगायतका वातावरणीय समस्याहरुको समाधान गर्नुपर्ने सम्बन्धी अधिक दबाब महसुस गर्ने गरेको पत्ता लागेको छ । अघिल्लो हप्ता मनाइएको विश्व वातावरण दिवसका दिनमा १४ देखि १६ वर्षीया किशोरकिशोरीहरुमा गरिएको सर्वेक्षणपछि यस्तो नतिजा प्राप्त भएको हो ।
सर्वेक्षणमा ८० प्रतिशत भन्दा बढी युवाहरुले पृथ्वीलाई जोगाउनुपर्ने सम्बन्धी ठूलो दबाब महसुस गर्ने गरेको बताएका हुन् र यस विषयमा आफ्नो तर्फबाट सुधार ल्याउन पर्याप्त साधन नभएको समेत धेरैले गुनासो गरेका हुन् । यसमा ३९ प्रतिशत युवाहरुले त उनीहरु वातावरणीय समस्याका बारेमा अत्यन्तै गम्भीर र ठूलो चिन्तित रहेको पनि बताएका हुन् । तर मान्छेका कारण पृथ्वीमा परिरहेका भयानक असरहरुका बावजुद आफूहरुले विद्यालयमा श्रोतसाधनको दिर्गकालीन प्रयोगकका बारेमा कमै सुन्ने गरेको उनीहरुको भनाइ छ ।
यसरी अहिलेकी सबैभन्दा सक्रिय युवा वातावरण कार्यकर्ता ग्रेटा थनबर्गले पनि विश्वभरका युवाहरुलाई यो विषयप्रति ध्यान केन्द्रित गर्न प्रेरित गरिरहेको पाइएको छ । त्यसैले अहिले धेरै युवामा वातावरणप्रतिको जिम्मेवारी अन्त्यमा आफैँले उठाउनुपर्ने सोच आइसकेको बताइएको छ । यसरी सर्वेक्षणमा सहभागी ३० प्रतिशत युवाहरुले विभिन्न अभियान सञ्चालन गरे यसमा राजनीतिक एवम् सामाजिक बदलाव ल्याउन सकिने विश्वास गरेका हुन् भने १४ प्रतिशतले सहभागीता जनाएको बताएका छन् ।
यसरी यो अनुसन्धानले वातावरण सम्बन्धी मुद्दामा युवाहरुको चासो बढ्दै गएको स्पष्ट पारेको छ ।
