काठमाडौं । पाकिस्तानले भारतका प्रधानमन्त्री नरेन्द्र मोदीलाई किर्गिस्तान जानका लागि पाकिस्तानको आकाशमार्ग प्रयोग गर्न दिने भएको छ ।
द टाइम्स अफ इण्डियाले मंगलबार जनाएअनुसार पाकिस्तानका एक उच्च अधिकारीले सो बारेमा जानकारी गराएका हुन् । मोदी संघाई कोअपरेसन अर्गनाइजेसन (एससीओ)को यही जुन १३ र १४मा हुन लागेको बैठकमा भाग लिन किर्गिस्तानको विश्केक जाने कार्यक्रम रहेको छ । भारतले गएको फेब्रुवरी २६मा पाकिस्तानको बालाकोटमा एयर स्ट्राइक गरेपछि सोही दिनदेखि भारतलाई आफ्नो आकाश प्रयोग गर्न दिएको छैन ।
भारतले आफ्ना प्रधानमन्त्रीलाई किर्गिस्तान जानका लागि हवाई मार्ग दिन पाकिस्तानलाई अनुरोध गरेको थियो । पाकिस्तानका सरकारी अधिकारीले प्रेस ट्रस्ट अफ इण्डिया (पीटीआई)लाई जानकारी दिएअनुसार इमरान खानको सरकारले भारतको अनुरोधलाई सैद्धान्तिक रुपमा स्वीकृति दिएको छ ।