काठमाडौं । राप्रपा नेपालबारे राप्रपा अध्यक्ष पशुपतिशमशेर राणाले दिएको अभिव्यक्तिमा कुनै सत्यता नभएको बताएको छ ।

राप्रपा नेपालले हिन्दु गणतन्त्र स्वीकार गरेर एकता हुन लागेको राप्रपा अध्यक्ष राणाले बताएका थिए ।

तर राप्रपा नेपालले त्यसमा गम्भीर आपत्ति जनाउँदै राप्रपा नेपालले सिद्धान्त परित्याग गरी पार्टी एकता गर्ने भन्ने परिकल्पना बाहिरको कुरा भएको बताएको छ ।

अत्यन्त कठिन समयमा समेत गर्वका साथ बोकेको विचार परित्याग गर्नुपर्ने कुनै आवश्यकता नरहेको राप्रपा नेपालका सह–प्रवक्ता मोहन श्रेष्ठले बताए । “सरकारमा जाने वा नजाने विषयमा पार्टीले कुनै निर्णय नगरेको पनि जानकारी गराउँदछौं,” श्रेष्ठले भने,“राप्रपा नेपाल र राप्रपाबीच एकताको सैद्धान्तिक सहमति भई पार्टीको केन्द्रीय समितिको बैठकले अनुमोदन समेत गरिसकेको अवस्थामा यस्ता गैरजिम्मेवार अभिव्यक्तिले एकताको वातावरण विगार्ने र एकता नचाहने शक्तिहरूलाई बल पुग्छ ।” उनले त्यस्ता विषयमा भ्रममा नपर्न सबैसँग आग्रह गरेका छन् ।