काठमाडौं । चौथो संस्करणको प्रधानसेनापति राष्ट्रिय पुरुष भलिबल प्रतियोगितामा त्रिभुवन आर्मी क्लब र गण्डकी प्रदेशले जित निकालेका छन् । यसअघिका दुबै खेलमा जित निकालेका दुबै टोलीले आफ्नो तेस्रो खेलमा पनि जित निकाल्न सफल भएका हुन् ।
लगनखेलस्थित आर्मी कवर्डहलमा भएको खेलमा आयोजक आर्मीले प्रदेश नम्बर २ लाई सोझो सेटमा हराएको हो । पहिलो खेलमा २५–१५ को जित निकालेको आर्मीले दोस्रो सेटमा २५–१२ र तेस्रो सेटमा २५–१३ को जित निकालेको हो ।
मंगलबार नै भएको अर्काे खेलमा गण्डकी प्रदेशले कर्णाली प्रदेशलाई ३–१ सेटमा हराएको हो । पहिलो सेटमा २५–२१ को जित निकालेको गण्डकीले दोस्रो सेटमा २५–२१ को जित निकाल्न सफल भयो । तेस्रो सेटमा भने कर्णाली प्रदेशले कम ब्याक गर्दै २५–२७ को जित निकाल्यो । निकै नै आक्रामक बनेको गण्डकी प्रदेशले चौथो सेटलाई भने २५–१४ ले सहजै आफ्नो पक्षमा पार्न सफल भयो ।
जितसँगै समूह ‘क’ को आर्मीले ३ खेलबाट ९ अंक जोडेको छ । यता समूह ‘ख’ को गण्डकीले ३ खेलबाट ९ अंक जोडेको छ । प्रतियोगिता अन्तर्गत मंगलबार नै दुई खेल हुनेछन् ।