काठमाडौं । सिरहाका प्रमुख जिल्ला अधिकारी श्रीकृष्ण श्रेष्ठले जिल्लाको अवस्था सामान्य भएको बताएका छन् । मोर्चाले तराई–मधेसका जिल्लामा बन्द आह्वान गर्दै प्रदर्शन तीव्र पारे पछि त्यसको प्रभाव सिराहामा पनि परेको छ । तथापि बन्दले जनजीवनमा असर पुर्याए पनि प्रदर्शन शान्तिपूर्ण रहेको प्रजिअले जानकारी दिएका हुन् ।
“एकाध ठाउँमा टायर बालेर अवरोध पुर्याउन खोजिएको हामीले बुझेका छौँ । बिहान एमाले सिराहा नगर कार्यालय अघिल्तिरका मेच–कुर्सी जलाए । अहिले अवस्था सामान्य छ,” उनको भनाई थियो ।
उनले गोलबजार, मिर्चैया, लहानलगायत जिल्लामा प्रमुख बजार क्षेत्रको अवस्था शान्तिपूर्ण रहेको बताए । “धेरै ठाउँमा हामीले जम्मासमेत हुन दिएका छैनौँ,” उनले जानकारी दिए ।
सोमबार मधेसी मोर्चा र प्रहरीबीच झडप हुँदा तीन जनाले ज्यान गुमाएको विरोधमा प्रदर्शनकारी आक्रोशित भएका हुन् ।