काठमाडौं । प्रहरीले त्रिभुवन अन्तर्राष्ट्रिय विमानस्थलबाट करोडौं भारतीय नक्कली नोटसहित ६ जनालाई पक्राउ गरेको छ । पक्राउ पर्नेमा तीनजना पाकिस्तानी र तीनजना नेपाल नागरिक रहेका छन् । प्रहरी प्रवक्ता डीआईजी विश्वराज पोखरेलका अनुसार विदेशबाट आएका तीनजना पाकिस्तानी नागरिकलाई रिसिभ गर्न जाँदा थप तीनजना नेपाली पक्राउ परेका हुन् । 

कतार एरयवेजबाट तीनजना पाकिस्तानी दुईवटा सुटकेश बोेकेर विमानस्थलमा अवतरण गरेका थिए ।  एउटा सुटकेसबाट ३ करोड अवैध भारतीय नक्कली मुद्रा बरामद भएको बताइएको छ भने अर्को सुटकेसमा भएको रकम गन्ने काम भइरहेको स्रोतले जानकारी दियो ।  पक्राउ पर्नेमा नेपाली नागरिक युनुस अन्सारी पनि रहेका छन् । उनीबाहेक अरुको नाम खुलाइएको छैन । युनुस यसअघि पनि नक्कली भारतीय रुपैयाँ कारोबार र लागूपदार्थ कारोबारमा पक्राउ परिसकेका व्यक्ति हुन् ।

अन्सारीमाथि केन्द्रीय कारागारमा रहँदा गोली प्रहार समेत भएको थियो । पूर्वमन्त्री सलीममिया अन्सारीका छोरा युनुश पहिलो पटक पक्राउ पर्नुअघि नेशनल टेलिभिजनका सञ्चालक थिए ।