काठमाडौं । प्रधानमन्त्री कप एकदिवसीय राष्ट्रिय क्रिकेट प्रतियोगिता शुक्रबारदेखि सुरू भएको छ ।
किर्तिपुरस्थित त्रिवि क्रिकेट मैदानमा उद्घाटन खेलमा अहिले विभागीय क्लब त्रिभुवन आर्मी र प्रदेश नम्बर २ बीच प्रतिस्पर्धा भइरहेको छ ।
टस हारेर पहिला ब्याटिङ गरेको आर्मीले प्रदेश २ लाई २ सय ७९ रनको विशाल दिएको छ । निर्धारित ५० ओभरमा २ सय ७९ रनको लक्ष्य बनाएको आर्मीका लागि राजु रिजालले ९० रन बनाए । १ सय ५ बल सामना गरेका राजुले ५ चौका र २ छक्का प्रहार गरे ।
कप्तान बिनोद भण्डारीले ६६ रन बनाए । ६१ बल खेलेका बिनोदले ९ चौका प्रहार गरे । रोहित पौडेलले ४७ रनको योगदान दिए । हरी चौहानले २६ रन बनाउँदा करण केसी ११ रनमा पभेलियन फर्किए । राजेश पुलामीमगरले ८,भिम सार्कीले ६,कुशल मल्लले ३ रन बनाए । सुसन भारी १२ रनमा अविजित रहे ।
प्रदेश २ का लागि हरीशंकर शाहले ३ विकेट लिए । बिबेक यादब,बिशाल सुलिङ र सम्शाद शेख र रासिख खानले १–१ विकेट लिए । प्रतियोगितामा ७ प्रदेश र ३ विभागिय टोली गरी १० टोली सहभागी छन् ।
