एजेन्सी ।  विश्व क्रिकेटमा आठ दिनपछि सुरु हुने एकदिवसीय विश्वकप क्रिकेटको रौनक छ ।

मनपर्ने खेलाडीको चर्चासँगै विश्वकपको उपाधि होडमा पुग्नसक्ने टोलीबारे समर्थकहरुबीच विभिन्न आंकलन भइरहेका छन् । प्रत्येक टोलीमा रहेका १५ सदस्यीय खेलाडीका बारेमा विश्व क्रिकेटका समर्थकको ध्यान केन्द्रित भएको छ । 

‘क्रिकेट पण्डित’हरु उपाधि होडमा पुग्नसक्ने टोलीबारे चर्चा गरिरहेका छन् । प्रतियोगिता सुरु हुन मात्र एक साता बाँकी रहँदा उपाधिको एक दाबेदार टोली भारतका कप्तान बिराट कोहलीले यो विश्वकप निकै चुनौतीपूर्ण रहेको बताएका छन् । 

उनले सुरुआती चरणमा रहेको चुनौतीले भारतका लागि समस्या हुनसक्ने बताएका छन् । एकदिवसीय विश्वकपमा भारत दुई पटकको विजेता टोली हो । २०२३ मा घरेलु मैदानमा एकदिवसीय विश्वकप आयोजनाको जिम्मेवारी पाएको भारत त्यसअघिको यो विश्वकप यादगार बनाउने रणनीतिमा छ । टोली कप्तान बिराट त्यही योजना अनुसार आफनो टोली तयार पार्दैछन् । 

१० राष्ट्र एकदिवसीय विश्वकपको उपाधिका लागि प्रतिस्पर्धा गर्दैछन । प्रत्येक टोलीले समूह चरणमा नौ खेल खेल्नु पर्नेछ । जसमध्ये चार टोली सेमिफाइनल पुग्नेछन् । इङ्ल्याण्ड जानुअघि कप्तान कोहलीले भने - फर्म्याटले पनि यो विश्वकप चुनौतीपूर्ण छ । सबै टोली निकै राम्रा छन् । २०१५ पछि अफगानिस्तानले आफूलाई निकै प्रमाणित गरेको छ । अरु टोलीले पनि । हामी आफनो वेष्ट दिनेछौं ।’

भारतले समूह चरणको पहिलो खेल दक्षिण अफ्रिकाविरुद्ध खेल्नेछ । त्यसपछि अष्ट्रेलिया, न्यूजील्याण्ड, पाकिस्तानसँग खेल्नेछ । दुई वर्षअघि २०१७ मा इङ्ल्याण्डमा भारतले आइसीसी च्याम्पियन्स ट्रफीमा पाकिस्तानसँग हार व्यहोरेको थियो ।