एजेन्सी । यमनको इरान समर्थित हुती विद्रोहीले साउदी अरबको एक विमानस्थलमा र सेनाको ब्यारेकमा ड्रोन आक्रमण गरेको छ । इरानले युरेनियम सम्बद्र्धनको क्षमता बढाउने घोषणा गरिरहेकै समयमा साउदी अरबको नजरान सहरमा हुती विद्रोहीले ड्रोन आक्रमण गरेको हो ।
आक्रमणबाट जनधनको भने कुनै क्षति नभएको बताइएको छ । ड्रोन आक्रमणका बारेमा हुतीको अल मसिराह स्याटेलाइट न्युज च्यानलले कासेफ–२ को ड्रोनबाट नजरानमा अवस्थित विमानस्थललाई लक्षित गरेर ‘आयुध भण्डार’ मा आक्रमण गरेको बताएको छ । साउदी अरब र यमनको सीमा नजिकै रहेको नजरान सहर रियादबाट आठ सय ४० किलोमिटरको दूरीमा पर्दछ ।
हुती विद्रोहीले केही समयबाट नजरान सहरमा आक्रमण गर्दै आएको छ । यस अघि साउदीको सरकारी एजेन्सीले कर्णेल तुर्क अल–मलिकीलाई उद्धृत गर्दै हुती विद्रोहीले नजरानमा एक नागरिक स्थललाई ‘लक्ष्य बनाउने’ प्रयास गरेको जानकारी दिएको थियो । यद्यपि यो घटनाका बारेमा विस्तृत केही पनि सार्वजनिक गरिएको भने थिएन ।