लण्डन । बेलायतकी प्रधानमन्त्री टेरेसा मेले युरोपेली संघबाट बेलायत अलग्गिने विषयको नयाँ संझौताको प्रस्तावलाई समर्थन गर्न सांसदहरुलाई आग्रह गरेकी छन् । प्रधानमन्त्रीले यसलाई पास गर्ने अब अन्तिम मौका भएको समेत जनाएकी छन् ।
उनले यदि संसदले युरोपेली संघबाट बाहिरिने विधेयकमा समर्थन गरेमा ब्रेक्जिटलाई लिएर दोस्रो पटक जनमत संग्रह गर्न आवश्यक छ कि छैन भन्ने विषयमा मतदान गर्न मौका मिल्ने समेत बताएकी छन् । उनले मंगलबार संसदलाई संशोधन गर्दै भनिन्,‘‘म यो अहम् मुद्दामा सदनको सच्चा र इमान्दार भावनको कदर गर्छु । सरकारले दोस्रो जनमत संग्रह गराउने मुद्दामा भोटिङ्ग गराउन सक्छ । तर, यसको लागि बेलायत युरोपेली संघबाट बाहिरिने सम्झौताका लागि मञ्जुरी मिलोस् ।’’
यसअघि प्रधानमन्त्रीको विधेयक संसदले तीन पटक अस्वीकृत गरिसकेको छ । चौथो पटक समेत यसबारेमा ठोस सहमति हुन नसकेमा संभवतः प्रधानमन्त्री मे ले पद नै त्याग्नुपर्ने हुन सक्ने यसअघि देखि नै चर्चा भइरहेको छ । विपक्षी सांसदहरुले पछिल्लो विधेयकपनि पहिलाको भन्दा खासै फरक नभएको बताउँदै आएका छन् । (बीबीसी र अन्य एजेन्सी)