काठमाडौं । तेस्रो संस्करणको भारतीय महिला लिग फुटबल प्रतियोगिताको बुधबार उपाधि छिनोफानो हुँदैछ । 

उपाधिका लागि तामिलनाडु क्लब सेतु र मणिपुर पुलिस स्पोर्टस क्लब आमने–सामने हुँदैछन् । नेपाली राष्ट्रिय खेलाडी साबित्रा भण्डारी र अनिता बस्नेत सेतुमा आबद्ध भएका कारण नेपाली समर्थकका लागि फाइनल खेल विशेष छ । 

खेल लुधियानास्थित गुरु नानक स्टेडियममा हुनेछ । सेतु अपराजित रहँदै उपाधि जित्न चाहान्छ । समूह चरणको पहिलो खेलमा मणिपुर पुलिसलाई हराएको सेतु फाइनलमा त्यही लयलाई निरन्तरता दिने रणनीतिमा छ । मणिपुर स्पोर्टस भने हारको बदला लिने लक्ष्यमा छ । सेतुविरुद्ध मणिपुर ६–४ को गोलअन्तरले पराजित भएको थियो । 

मणिपुरविरुद्ध डेब्यू गरेकी नेपालकी साबित्राको प्रदर्शनबारे विभिन्न चर्चा भइरहेका छन् । साबित्राले टोलीलाई जिताउन चार गोल गरेकी थिइन् । 

मणिपुरविरुद्धको डेब्यूसँगै भारतीय महिला लिगमा साबित्राले शानदार प्रदर्शन गरेकी छन् । सेतुलाई सोमबारमात्र फाइनलको यात्रा तय गराउन साबित्राले चार गोल गरेकी थिइन् । उनको उत्कृष्ट प्रदर्शनमा सेतुले सेन्ट्रल एसएसबीलाई ८–१ को गोलअन्तरले हराएको थियो ।

समग्रमा साबित्राले भारतीय महिला लिगमा १३ गोल गरेकी छन् । उनी सर्वाधिक गोल गर्ने खेलाडीको दोस्रो नम्बरमा छन् । नेपालकी अनिता बस्नेतले पनि एक गोल गरेकी छन् । विदेशी एकमात्र खेलाडी मैदान उतार्न पाउने नियमको शिकार भएकी अनिताले भने आफनो प्रदर्शन देखाउन पाएकी छैनन् । 

गतसंस्करण उपविजेतामा सिमित रहेको सेतु पहिलो पटक उपाधि जित्ने योजनामा छ ।