काठमाडौं । पाँचथरको मिक्लाजुङ गाउँपालिका आरुबोटेमा दुई परिवारका नौजनाको हत्या भएको छ । दुई परिवारका नौ जनालाई खुकरी प्रहार गरी हत्या गरिएको बताइएको छ । धनराज लिम्बुको घरमा पाँचवटा र बमकुमार लिम्बुको घरमा चारवटा शव फेला परेको प्रहरी प्रवक्ता डीआईजी विश्वराज पोखरेलले जानकारी दिए ।
प्रमुख जिल्ला अधिकारी मुरारी वस्तीका अनुसार घटना भएको स्थान सदरमुकामबाट ६५ किमी टाढा छ ।
“धारिलो हतियार प्रहार गरेको भन्ने सूचना पाइएको छ,” उनले भने, “खुकुरी प्रहार गर्न लाग्दा एकजनाले भागेर ज्यान बचाएका छन् । हत्या कसले र किन गर्यो भन्ने केही खुलेको छैन ।” हत्या भएका दुबै परिवार ससुरा र ज्वाईँको भएको उनले बताए । घटनाको अनुसन्धानका लागि संघीय प्रहरी इकाइ कार्यालयका एसएसपीको नेतृत्वमा, सीआईबीको एसपीको नेतृत्वमा, प्रदेश प्रहरीको विशेष टोली र क्षेत्रीय अनुसन्धानको कुकुरसहितको टोली घटनास्थलका लागि प्रस्थान गरेको छ । घटनास्थल सदरमुकामबाट टाढा भएकाले पुग्न केही ढिला हुन सक्ने प्रदेश नम्बर १ प्रहरी प्रवक्ता डीएसपी सिद्धराज न्यौपानेले जानकारी दिए ।
हत्या गरिएकामा ३६ वर्षीया जस्मिता फियाक, ४१ वर्षीया धनराज शेर्मा, २६ वर्षीया मनकुमारी फियाक, छ वर्षीया इक्सा शेर्मा, १३ वर्षीया योवना शेर्मा, आठ वर्षीया मुना शेर्मा, ७४ वर्षीय बमबहादुर फियाक, नाम नखुलेकी बमबहादुरकी श्रीमती र १२ वर्षीया आशिका खजुम लिम्बुको विभत्स हत्या भएको छ । १२ वर्षीया सीता खजुम भने भागेर बाँच्न सफल भएकी छन् ।
घाइते सीताले स्थानीयवासीलाई दिएको जानकारीअनुसार मुखुण्डो लगाएर आएको समूहले धारिलो हतियार प्रहार गरी सबैको हत्या गरेको थियो ।