काठमाडौं । विखण्डनवादी समूहको नेतृत्व गर्दै मुलधारको राजनीतिमा प्रवेश गरेका डा. सीके राउतको पार्टी निर्वाचन आयोगमा दर्ता भएको छ । राउतले नेतृत्व गरेको जनमत पार्टीलाई आयोगले सोमबार दलको मान्यता दिएको हो ।
उनले सामाजिक सञ्जाल फेसबुकमा आफूले नेतृत्व सम्हालेको पार्टीले आधिकारिक रुपमा नयाँ राजनीतिक दलको मान्यता पाएको उल्लेख गरेका छन् । ‘‘निर्वाचन आयोगको बैठक संख्या ६, मिति २०७६-०२-०६ को निर्णयानुसार डा. सीके राउत नेतृत्वको ‘जनमत पार्टी’ नयाँ राजनैतिक दल दर्ता भएको छ । सोको सूचना नेपाल राजपत्रमा प्रकाशित गर्ने निर्णय समेत गरिएको छ’’राउतले सामाजिक सञ्जालमा लेखेका छन् ।
गत फागुन २४ गते राष्ट्रियसभा गृहमा आयोजित एक समारोहमा सरकारसँग राउत नेतृत्वको स्वतन्त्र मधेस गठबन्धन नामक संगठनले ११ बुँदे सम्झौता गरेर पृथकतावादी आन्दोलन परित्याग गरेको थियो । त्यसको केही दिनपछि राउतले जनमत पार्टी गठन गरेर मुलधारको राजनीतिमा आएको घोषणा गरेका थिए ।