काठमाडौं । दुईपांग्रे सवारीसाधनको पछाडि बस्ने यात्रुले पनि हेल्मेट लगाउनु पर्ने व्यवस्था तत्काल लागु नहुने ट्राफिक प्रहरीले स्पष्ट पारेको छ । हिजोमात्रै ट्राफिक महाशाखाले यस्तो व्यवस्था लागु गरिन लागेको बताएपछि त्यसले बहस निम्त्याएको छ ।
आज ट्विटरमा सूचना जारी गर्दै प्रहरीले भनेको छ– ‘‘उच्च गुणस्तरको हेल्मेटको प्रयोग भएमा दुर्घटनाबाट हुने क्षति न्यून हुन सक्ने र यो नियम तत्काल कार्यान्वयन नहुने भई यातायात व्यवस्था विभाग, ट्राफिक प्रहरी र अन्य सरोकारवाला निकायबीचको समन्वय र सहकार्य पश्चात् कार्यान्वयन हुने व्यहोरा अनुरोध ।’’
कार्यालयले हिजोमात्रै आगामी असारदेखि सो नियम लागु हुने जनाएको थियो । प्रहरीले सवारी तथा यातायात व्यवस्था ऐन २०४९को परिच्छेद ७ को दफा १३० को उपदफा २ बमोजिम यो नियम ल्याइएको जनाएको छ ।