एजेन्सी । जलवायु परिवर्तनको सामना गर्न बेलायतभरका सबै नगर तथा शहरमा १ लाख तीस हजार रुखहरु रोपिने सरकारले जनाएको छ । यसका लागि आगामी दुई वर्षमा अर्बन ट्री च्यालेन्ज फन्ड मार्फत १ करोड पाउन्ड उपलब्ध गराइने बताइएको छ ।
यसरी वन निकायले सञ्चालन गर्ने भनिएको यो अभियान व्यक्तिगत, स्थानीय निकाय, च्यारिटी लगायत गैरसरकारी संस्थाहरुका लागि समेत सहभागीता जनाउन खुला रहेको बताइएको छ । यसरी पहिलो तीन वर्ष निकायको रेखदेखमा सो रकम एक लाखबढी रुख रोप्नका लागि प्रयोग गरिने बताइएको हो ।
वातावरण सचिव माइकेल गोभले भनेका छन्, “जलवायु परिवर्तन विरुद्धको लडाईँमा रुखहरुको धेरै ठूलो भूमिका रहने गरेको छ । त्यसकारण हामीले छोटो समयमा वृक्षरोपणको दर वृद्धि गर्नुपर्छ ।”
यसरी रुखले कार्बन स्टोर गर्ने हुनाले पनि वृक्षरोपण मार्फत जलवायु परिवर्तनबाट हुने क्षति सिमित गर्न सकिने बताइएको छ । यसका साथै शहरी क्षेत्रमा रुखबिरुवाले स्वास्थ्यमा सुधार ल्याउन, मानिसहरुलाई बाहिर निस्कन प्रोत्साहन गर्न, आवाज सोस्न, बाढीको जोखिम कम गर्न, छाँया दिन र हरियालीमय वातावरण सिर्जना गर्न मद्दत गर्ने हुँदा यसका अतिरिक्त फाइदाहरु पनि अनगिन्ती हुने बताइएको छ ।
वन निकायका प्रमुख सर ह्यारी स्टडहोल्म भन्छन्, “यसले हामीलाई मान्छे बस्ने र कामगर्ने ठाउँ नजिकै धेरै रुख बिरुवा रोप्ने अवसर दिलाएको हुँदा यो अभियानले धेरै फरक पार्नेछ । त्यसैले आउँदो शरद ऋतुमा धेरै भन्दा धेरै रुखहरु रोपिने हाम्रो अपेक्षा छ ।”
यसरी नयाँ रुखहरु शहरहरुमा मात्र रोपिने बताइएको छ जसले शहरलाई पनि प्रकृतिको आनन्द उठाउने उपयुक्त स्थान बनाइदिने भनिएको हो । यसरी अघिल्लो वर्ष सर विलियमले रुखबिरुवाहरुका एकदम धेरै फाइदा भएको हुँदा तिनीहरु ग्रामीण क्षेत्रमा मात्र नभएर नगर र शहरमा पनि प्रशस्त रहेको सुनिश्चित गरिनुपर्ने बताएका थिए । इन्डिपेन्डेन्ट
