काठमाडौं । दोस्रो चन्द्रागिरी उपमेयर कप अन्तरविद्यालय स्तरीय खुल्ला छात्रा भलिबल प्रतियोगिता आगामी बुधबारबाट सुरु हुने भएको छ । भलिबल राष्ट्रिय खेल घोषणा भएको दिनलाई भलिबल डे मनाउने लक्ष्यसहित आयोजना हुन लागेको प्रतियोगिता ११ गतेसम्म चल्नेछ । 

आयोजक मदन भण्डारी स्पोर्टस् एकेडेमी चन्द्रागिरी नगर कमिटिले काठमाडौंमा पत्रकार सम्मेलन गरी प्रतियोगिताबारे जानकारी दिएको छ । १० स्कुलको सहभागिता रहने प्रतियोगिता लिग कम नकआउटका आधारमा हुने अध्यक्ष अष्टकुमार महर्जनले जानकारी दिए । लिग र क्वाटरफाइनलका खेल बेस्ट अफ थ्री र सेमिफाइनल र फाइनल बेस्ट अफ फाइभ आधारमा चल्ने प्राविधिक संयोजक कुमार राईले जानकारी दिए । 
विजेताले ६० हजार नगदसहित शिल्ड मेडल र प्र्रमाणपत्र पुरस्कार पाउनेछन् । दोस्रो हुने टोलीले ३० हजार, तेस्रो हुने टोलीले १५ हजार तथा चौथो हुने टोलीले १० हजार प्राप्त गर्नेछ । सर्वोत्कृष्ट खेलाडीले १ हजार पाँच सय, व्यक्तिगत ५ विधामा उत्कृष्ट हुनेलाई १ हजार पुरस्कार दिइने संयोजक राईले जानकारी दिए । 

यस्तै, प्रतियोगिताको अवसरमा नै भलिबल दिवस मनाउने क्रममा कुनै एक विभागिय टोली र न्यु डायमण्ड एकेडेमीबीच सेलिब्रेसन खेल हुनेछ ।