बीबीसी । लोकसभा चुनावको अन्तिम चरणको प्रचार पूरा भएपछि प्रधानमन्त्री नरेन्द्र मोदी केदारनाथ र बद्रीनाथको यात्रामा छन् । उनको यात्रालाई भारतका सबै टेलिभिजन च्यानलहरुले प्रशारण गरिरहेका छन् ।
यसप्रति तृणमूल कांग्रेसले आपत्ति जनााउँदै आचारसंहिताको उल्लंघन गरिएको बताएको छ । तृणमूल कांग्रेसले निर्वाचन आयोगमाथि आचारसंहिता उल्लंघन हुँदा पनि नजरअन्दाज गरेको आरोप लगाएको छ । तृणमूलका नेता डेरेक ओ ब्रायनले आयोगलाई पत्र पठाएर प्रधानमन्त्रीको यात्रा प्रसारणमा तत्काल रोक लगाउन माग गरेका छन् ।
डेरेकले पत्रमा भनेका छन्, “प्रधानमन्त्रीले आफ्नो यात्राका दौरान केदारनाथ मन्दिरका लागि बनाइएको मास्टर प्लानको पनि घोषणा गरे र त्यहाँका मानिसहरुसँगै मिडियालाई सम्बोधन पनि गरे । यो सरासर गलत छ र अनैतिक पनि । यो आचारसंहिताको उल्लंघन हो ।’’ मतदाता आफूप्रति प्रभावित गर्नका लागि यात्राका बारेमा मिनेट–मिनेटमा आमजनतालाई जानकारी दिने काम भइरहेको उनको दाबी छ ।
प्रधानमन्त्री मोदी शनिबार केदारनाथको यात्रामा छन् । जहाँ उनले झण्डै १७ घण्टा बिताएका थिए । मोदीले केदारनाथमा पूजा र गुफामा ध्यान गरेका थिए ।