काठमाडौं । पोखरामा खानाका पारखीहरुलाई विशेष स्वाद पस्किन सफल ‘क्रसरोड थकाली भान्सा’ काठमाडौंमा पनि खुलेको छ । काठमाडौंको कमलादीमा आज आइतबारदेखि ‘क्रसरोड थकाली भान्सा’ सञ्चालनमा आएको छ । पोखराको न्यूरोड चिप्लेढुंगाबाट सुरु भएको व्यवसाय विस्तारको क्रममा कमलादीमा खुलेको सञ्चालक वीरेन्द्र शेरचनले जानकारी दिए ।

“अरुले काठमाडौंमा सुरु गरेर मोफसलमा विस्तार गर्छन्, हामी मोफसलबाट विस्तार गर्ने क्रममा काठमाडौं प्रवेश गरेका छौं,” उनले भने । पोखराको न्यूरोड र लेकसाइडमा यसअघि नै व्यवसाय गर्दै आएका शेरचनले काठमाडौंमा ६ जनाको लगानीमा खोलेको जनाए । “हामी अनिल हिराचन, अनिल तुलाचन, राजु ताम्राकार, सविना प्रधान, आक्रोश बज्राचार्य मिलेर सञ्चालनमा ल्याएका हौं,” उनले भने ।

पोखरा न्यूरोडमा १० वर्ष, लेकसाइडमा ८ वर्षको अनुभव संगालेर काठमाडौंमा खानाका पारखीहरुको लागि विशिष्ट स्वाद पस्किन तयार रहेको बताए । “काठमाडौंबाट पोखरा जाने अधिकांश ग्राहकले विशिष्ट स्वाद रहेकाले काठमाडौंमा पनि विस्तार गर्न सुझाव दिनुभएको थियो, ग्राहकको त्यही सुझावलाई आत्मसात गर्दै हामीले काठमाडौंमा सेवा सञ्चालनमा ल्याएका हौं,” शेरचनले भने ।

मुस्ताङबाट ल्याएको दाल, फापरको पिठो, च्याङग्राको सुकुटी, जिम्मुलगायतका खाना ‘क्रसरोड थकाली भान्सा’ मा प्राप्त हुनेछ । ‘घोकेन’ (फापरको पिठोबाट बनाइने ब्रेडजस्तो परिकार), ‘आलु सुकुटी प्ला’ लगायतका विशेष खानेकुरा यस भान्साका विशेषता रहेका छन् ।
ग्राहककै सुझावअनुसार कन्टिनेन्टल खानाको पनि व्यवस्था गरिएको छ । 

“काठमाडौंमा हामीले धेरै ठाउँमा थकाली भान्सा लेखेको पाइयो, तर त्यहाँ थकाली परिकार पाइएन,” शेरचनले भने, “थकाली स्वादका लागि एकपटक हामीलाई सेवा गर्न मौका दिनुहोस् ।”