काठमाडौं । लघुकथाकार शुषमा मानन्धरको लघुकथा संग्रह ‘घाम’ को लोकार्पण गरिएको छ । आइतबार काठमाडौंमा लघुकथा समाज नेपालद्वारा आयोजित कार्यक्रममा प्राज्ञ तथा कथाकार माया ठकुरी, नाट्यकर्मी अशेष मल्ल, समालोचक प्राडा लक्ष्मणप्रसाद गौतमले उक्त कृतिको संयुक्तरुपमा लोकार्पण गरे ।
कार्यक्रमकी प्रमुख अतिथि प्राज्ञ माया ठकुरीले शुषमाका लघुकथामा समाज बोलेको उल्लेख गर्दै संग्रहका कतिपय लघुकथा अत्यन्तै मार्मिक रहेको उल्लेख गरिन् । नाट्यकर्मी अशेष मल्लले आफूहरूले खलिल जिब्रानलाई पढ्दै लघुकथा लेख्न सिकेको बताए । उनले सारिका र धर्मयुग जस्ता पत्रिकामा छापिएका लघुकथाहरूले चार दशकअघि नै लघुकथा लेखनमा प्रेरित गरेको बताउँदै अहिले लघुकथा लेखनले फड्को मारेको उल्लेख गरे । उनले शुषमाको कथ्य शील्प सुन्दर भएको चर्चा गरे ।
समालोचक प्राडा लक्ष्मणप्रसाद गौतमले लघुकथाकार मानन्धरको लेखनशील्पको चर्चा गर्दै संग्रहका ७५ प्रतिशत कथा राम्रो रहेको बताए । उनले कृतिमा भाषागत त्रुटी रहेको पनि उल्लेख गरे । लघुकथा समाजका अध्यक्ष साहित्यकार श्रीओम रोदनको सभापतित्वमा सम्पन्न सो कार्यक्रममा लेखिका शुषमा मानन्धर तथा तुलसीहरि कोइरालाले बोलेका थिए ।
कार्यक्रममा आख्यान क्षेत्रका चर्चित व्यक्तित्वहरूको उपस्थिति थियो ।