एजेन्सी । वेस्ट इन्डिजले इङ्ल्याण्ड र वेल्समा ११ दिनपछि सुरु हुने एकदिवसीय विश्वकप क्रिकेटका लागि अलराउण्डर ड्यानी ब्राभो र किरोन पोलार्डलाई वैकल्पिक खेलाडीमा समावेश गरेको छ । विश्वकपका लागि १५ सदस्यीय टोली घोषणा गरिसकेको वेस्ट इन्डिजले यि दुई खेलाडीलाई वैकल्पिक खेलाडीमा समावेश गरेको हो । गत अक्टोबरमा अन्तरराष्ट्रिय क्रिकेटपछि बिदा लिएर फर्किएका ब्राभो १० सदस्यीय टिामका लागि चयन भएका थिए । 

पोलार्डले हालै इन्डियन प्रिमिएर लिग क्रिकेटमा मुम्बई इन्डियन्सलाई कीर्तिमानी चौथो पटक उपाधि जिताउन महत्वपूर्ण भूमिका खेलेका थिए । वैकल्पिक खेलाडीमा समावेश खेलाडी साउथ ह्याम्पटनमा हुने ४ दिनको प्रशिक्षणमा सहभागि हुनेछन् ।  

३५ वर्षिय ब्राभोले १ सय ६४ एकदिवसीय अन्तरराष्ट्रिय खेल खेलेका छन् । २००४ मा इङल्याण्डविरुद्ध खेल्दै एकदिवसीय करिअर सुरु गरेयता ब्राभोले २९ सय ६८ रन बनाएका छन् ।  पछिल्लो पटक उनले २०१४ मा भारतविरुद्ध एकदिवसीय सिरिज खेलेका थिए । 

३२ वर्षिय पोलार्डले १ सय १ एकदिवसीय क्रिकेटमा सहभागिता जनाएका छन् । २००७ मा दक्षिण अफ्रिकाविरुद्ध खेल्दै एकदिवसीय क्रिकेटमा डेब्यु गरेका पोलार्डले २२ सय ८९ रन बनाएका छन् । बलिङतर्फ ५० विकेट लिएका छन् । पछिल्लो समय पोलार्डले २०१६ मा पाकिस्तानविरुद्ध एकदिवसीय अन्तरराष्ट्रिय सिरिज खेलेका थिए ।