केदारनाथ धाम । भारतका प्रधानमन्त्री नरेन्द्र मोदीले १७ घण्टासम्म गुफामा ध्यान गरेपछि आइतबार बिहान केदारनाथ मन्दिरमा पूजा अर्चना गरेका छन् । उनी शनिबार २ बजे ध्यानको लागि गुफामा गएका थिए । उनले राति पनि त्यही विश्राम गरेका थिए । प्रधानमन्त्री मोदी आइतबार बिहान गुफाबाट निस्कने क्रममा लौरो टेकेर उबडखाबड पहाडी बाटोबाट हिँड्दै मन्दिर पुगेका थिए । 

एनडीटिभीका अनुसार उनले बाटोमा बरफले ढाकेको पहाड पनि हेरेका थिए । केही समय उनी मन्दाकिनी नदीको किनारामा एक ढुंगामा बसे । मोदीले केदारनाथमा पूजा अर्चना गरेपछि भगवान केदारनाथको आशीर्वाद भारत र सम्पूर्ण मानव जातिप्रति रहने बताएका थिए । सोही समयमा एक पत्रकारले सोधे, ‘‘के  प्रार्थनाको क्रममा चुृनावमा जित होस् भन्ने आशीर्वाद माग्नुभयो ? ’’

यसमा प्रधानमन्त्री मोदीले भनेका थिए, ‘‘म केही पनि माग्दिन । म माग्नेको प्रवृत्तिमा सहमत पनि छैन  । किनकी उहाँले हामीलाई माग्न योग्य बनाउनुभएको छैन । उहाँले हामीलाई दिन योग्य बनाउनुभएको छ ।  ईश्वरले जसलाई दिने योग्य बनाउनुभएको छ , उसले समाजलाई दिनुपर्छ ।’’

उनले थपे, ‘‘भगवान बाबा केदारनाथ भारत मात्रै होइन पूरै मानव जातिका लागि, उनीहरुको सुख समृद्धि र कल्याणका लागि आशीर्वाद दिइरहनु भएको छ ।’’

साथै प्रधानमन्त्रीले केही वर्षदेखि आफूलाई केदारनाथको आध्यात्मिक चेतनाको भूमिमा आउने शौभाग्य प्राप्त भएको समेत बताए । उनले केदारनाथ आउन अनुमति दिएकोमा चुनाव आयोगप्रति पनि आभार व्यक्त गरेका थिए । यसले गर्दा आफूलाई दुई दिनको छुट्टी मिलेको समेत चर्चा गरे । आफू गुफामा भएको बेलामा बाहिरको सम्पर्कबाट पूरै बाहिर रहेको समेत जनाए ।  

उनका अनुसार त्यो गुफाको एउटा झ्यालबाट २४ सै घण्टा केदारनाथको दर्शन गर्न मिल्छ । केदारनाथमा चलिरहेको पुनर्निर्माण कार्य प्रधानमन्त्रीले विकास मिसन भएको र त्यसमा प्रकृति, पर्यावरण र पर्यटनको बारेमा ध्यान राख्नुपर्ने उनले बताए । उनले केदारनाथको कामको लागि एक समर्पित टिम रहेको र त्यो टिम मेहनतका साथ काम गरिरहेको उनले जनाए । उनले आफू स्वयंले पनि समय समयमा भिडियो कन्फरेन्समार्फत त्यहाँ भइरहेको कार्यको निगरानी गरिरहेको बताए ।

प्रधानमन्त्री मोदीले केदारनाथमा काम राम्रोसँग भइरहेको चर्चा गर्दै अब मानिसहरु सिंगापुर वा दुबई जानुको साटो केदारनाथ वा भारतका अन्य स्थानमा जान सक्ने बताए । प्रधानमन्त्री मोदी आज बद्रीनाथको समेत दर्शन गर्न जानेछन् ।