काठमाडौं । नेपाली राष्ट्रिय महिला फुटबल खेलाडी अनिता बस्नेत यतिबेला भारतीय महिला लिग खेलिरहेकी छन् । अनितासँगै स्टाइकर सावित्रा भण्डारी तामिलनाडु क्लब सेतुको प्रतिनिधित्व गरिरहेका छन् । सेतु भोलि (शनिबार) बरोडा फुटबल एकेडेमीसँग प्रतिस्पर्धा गर्दैछ ।
एक खेल अगावै सेतुले अन्तिम चारमा स्थानमा बनाइसकेको छ । ४ खेलमा जित निकालेको सेतु १२ अंकसहित समूहको शीर्ष स्थानमा छ । सेतुको जितमा नेपालका अनिता र सावित्रा दुबैले उत्कृष्ट प्रदर्शन गरेका छन् ।
पहिलो पटक व्यावसायिक लिगमा आबद्ध अनिताले लिगबाट धेरै सिक्न पाएको बताएकी छन् । बाह्रखरीसँगको कुराकानीमा अनिताले भारतको राष्ट्रिय टोलीका अनुभवी खेलाडी समेत सेतुमा आबद्ध रहेकाले उनीहरुबाट धेरै सिक्न पाइरहेको बताइन् ।
उनले भनिन्, “३ जना धेरै अनुभवी खेलाडी छन् । उनीहरुसँग सिक्न पाइरहेका छौं । साथै प्रशिक्षकबाट पनि नयाँ कुराहरु सिक्न पाइरहेका छौं ।” सेतुले लिगमा चार खेल खेल्दा अनिताले तीन खेलमा खेल्न अवसर पाएकी छन् । सुरुआती खेलमा बेन्चमा बिताएकी अनिताले आफ्नो डेब्यू तथा सेतुको दोस्रो खेलमा बेङ्लोर युनाइटेडविरुद्ध एक गोलसमेत गरेकी थिइन् । लिगमा एउटा खेल अवधिभर विदेशी एकमात्र खेलाडी मैदान उतार्न पाउने नियम छ ।त्यही नियमका कारण अनिता सेतु लिगको पहिलो खेलमा मणिपुर पुलिस स्पोर्टस्सँग खेल्दा बेन्चमा बस्न बाध्य भइन् ।
“नेपालमा कहिले बेन्चमा नबसेको म, जहिले प्लेइङ सेटमा पर्ने खेलाडी । पहिलो खेलमा नै बेन्चमा बस्दा निकै दुःखी भएँ । ९० मिनेट बेन्चमा बस्दा त निकै सकस भयो । नियम पछिमात्र थाहा पाएँ एकजना मात्र खेल्न पाउने भनेर । गिल्टी फिल भयो,” अनिताले भनिन् ।
अनिताले यसअघि माल्दिभ्समा फुटसल खेलेकी थिइन् । फुटसल खेल्दा पनि अनिता र सावित्रा सँगै थिए । भारतीय लिगमा एउटै क्लबमा रहेरपनि सँगै खेल्न नपाउँदा अनिता दुःखी छन् । “सावित्रा र म अहिलेसम्म छुट्टिएर खेलेका छैनौं । यो लिगको नियमले सँगै खेल्न नपाइने रहेछ । यसले दुःख लागेको छ । एक–अर्कासँग समन्वय राम्रो छ । दुवै मैदानमा हुँदा ढुक्क भएर खेल्छौं । तर पनि यहाँको नियमले केही अप्ठ्यारो मात्र पारेको हो । दुवै जनामध्ये जसले मैदानमा खेले पनि शतप्रतिशत प्रदर्शन गर्नेछौँ,” अनिताले भनिन् ।
पहिलो पटक विदेशी लिगमा आबद्ध अनिता टोलीलाई च्याम्पियन बनाउन प्रयासरत छिन् । उनले भनिन, “मैदान उत्रिसकेपछि जित नै लक्ष्य हो हाम्रो । हरसम्भव कोसिस गरिरहेकी छु राम्रो खेल्न । प्रशिक्षकको पनि टोलीलाई च्याम्पियन बनाउने लक्ष्य छ । त्यसमा सावित्रा र मैले पनि कोशिस गरेका छौं । अरु खेलाडी पनि राम्रै छन् ।”
अनिता र सावित्रा नेपालमा पनि एउटै क्लबबाट खेल्छन् । सशस्त्रको एपीएफमा आबद्ध उनीहरु राष्ट्रिय टोलीका महत्वपूर्ण सदस्य हुन् । राष्ट्रिय टोलीमा डेब्यू र विभागीय टोली एपीएफमा एकै पटक अनुबन्धित भएका दुवैको लक्ष्य सेतुलाई लिग च्याम्पियन बनाउने हो ।
यतिमात्र होइन, आफ्नो प्रदर्शनबाट आगामी लिगमा नेपाली अरु खेलाडीलाई पनि आबद्ध हुने बाटो खुल्ला गर्नु हो । त्यसका लागि अनिता आफ्नो क्षमता देखाउन लागिपरेको बताउँछिन् । “नेपालको हाम्रो टिममा पनि राम्रो खेलाडी छन् । लिगमा आबद्ध हुन सके धेरै सिक्न पाइन्छ,” अनिताले थपिन् ।
अनिता गत फागुनमा विराटनगरमा सम्पन्न पाँचौं महिला साफ च्याम्पियनसिपबाट चर्चामा आएकी खेलाडी हुन् । श्रीलंकाविरुद्ध गोल गरेपछि पाउलो डेबालाको स्टाइलमा सेलिब्रेसन गरेकी अनिता विभिन्न मिडियाको नजरमा परिन् । श्रीलंकाविरुद्ध गोलको सेलिब्रेसन मात्र नभई उनको प्रदर्शन पनि हेर्न लायक थियो ।
घरेलु प्रतियोगितामा एपीएफलाई च्याम्पियन बनाउन अनिता र सावित्राले महत्वपूर्ण भूमिका निर्वाह गरिरहेका छन् । सन् २०१४ मा पाकिस्तानको इस्लामावादमा भएको तेस्रो महिला साफ च्याम्पियनसिपबाट अनिता र सावित्राले राष्ट्रिय टोलीमा डेब्यू गरेका थिए ।