काठमाडौं ।  संस्कृतिविद् सत्यमोहन जोशीलाई शुक्रबार नेपालका लागि चिनियाँ राजदूत होउ यान्छीले भेटेकी छन् । ललितपुरको बखुम्बहालस्थित जोशीको निवासमै पुगेर उनले भेटघाट गरेको जोशीका सहयोगीले बाह्रखरीलाई जानकारी दिएका छन् । वैशाख ३० गतेबाट जोशी १०० वर्ष लागेका छन् । उनीहरुबीच करिब ४५ मिनेट कुराकानी भएको जनाइएको छ । 

भेटका क्रममा राजदूत यान्छीले संस्कृतिविद् जोशीको सुस्वास्थ्य एवं दीर्घजीवनको कामना समेत गरेकी थिइन् । जोशीले सो अवसरमा अरनिकोको बारेमा आफूले लेखेका कृतिहरु तथा अरनिको र नेपाल एवं चीनको सम्बन्ध बारेमा राजदूतसँग चर्चा गरेका थिए । त्यस्तै चिनियाँ भाषाको बारेमा आफूले गरेको अनुसन्धानको बारेमा समेत उनले जानकारी गराएका थिए ।

राजदूत यान्छीले चिनियाँ राजदूतले जोशीलाई चीन भ्रमणका लागि प्रस्ताव समेत गरेकी थिइन् । संस्कृतिविद् जोशीले आफ्नो स्वास्थ्य अवस्था र उमेरका कारण भ्रमणका लागि असमर्थ रहेको बताएका थिए ।

भेटका क्रममा राजदूत यान्छीले संस्कृतिविद् जोशीलाई दीर्घजीवन र सुस्वास्थ्यको कामना गर्दै मायाको चिनो प्रदान गरेकी थिइन् । यससँगै ललितपुर महानगरपालिकाका तर्फबाट प्रमुख चिरीबाबु महर्जनले मन्छिन्द्रनाथको रथ प्रदान गरेका थिए ।