सरकारी अस्पताल सरह सुविधा पाउनुपर्ने माग राख्दै दुई नर्स आमरण अनसनमा

अनसनको छ दिन बितिसक्दा पनि वार्ताका लागि कुनै पहल भएको छैन । दुबै जनाको स्वास्थ्य दिनानुदिन कमजोर बन्दै गएको छ ।

सरकारी अस्पताल सरह सुविधा पाउनुपर्ने माग राख्दै दुई नर्स आमरण अनसनमा

काठमाडौं । राष्ट्रिय तथा अन्तर्रा्ष्ट्रियस्तरमा हुने सम्मेलनमा नर्सहरूलाई सहभागी हुने मौका दिनुपर्ने, सरकारी अस्पतालमा पाइने सबै सुविधा उपलब्ध गराइनुपर्नेलगायतका माग राखेर दुई जना नर्सले अनसन सुरु गरेका छन् ।

मानव अंग प्रत्यारोपण केन्द्र भक्तपुरका दुई नर्सले अनसन सुरु गरेको छैठौं दिनसम्म पनि वार्ताका लागि कुनै पनि पहल भएको छैन । अनसनरत दुई नर्सहरुले आफूहरुको माग पूरा नभएसम्म अनसन जारी राख्ने बताएका छन् । 

गत शुक्रबारदेखि नर्स जिता बरालले लाजिम्पाटस्थित नर्सिङ संघको भवनमा अनसन सुरु गरेकी थिईन् भने नर्स डिकी शेर्पाले शहिद धर्मभक्त अंग प्रत्यारोपण केन्द्रको प्रांगणमा अनसन सुरु गरेकी थिईन् । तर, अहिले अनसनरत दुबै नर्सलाई अस्पतालमा भर्ना गरिएको छ । 

उनीहरु दुबै जनाको स्वास्थ्यमा समस्या आएपछि नर्स बराललाई बीपी स्मृति अस्पतालको वार्डमा उपचार भइरहेको छ भने नर्स शेर्पाको मान अंग प्रत्यारोपण केन्द्रमा उपचार भइरहेको छ । नर्स बरालको उपचारमा संलग्न एक स्वास्थ्यकर्मीले स्वास्थ्य अवस्था नाजुक बन्दै गएको बताइन् । 

पटक पटक आन्दोलन र धर्ना बस्दा समेत समस्या समाधान गर्न नर्सिङ संघ र अस्पताल प्रशासनले पहल नगरेको भन्दै गत शुक्रबारबाट संघ र अस्पताल परिसरमा नर्सहरुले आमरण अनसन सुरु गनुपरेको अनसनरत नर्सकी सहयोगी नर्स इला कोइरालाले बताइन् । 

उता नर्सिङ संघकी अध्यक्ष तारा पोख्रेलले आफू हरेक दिन नर्सहरु लिएर मन्त्रालयमा छलफल गरेको र बुधबार पनि मानव अंग प्रत्यारोपण केन्द्रका निर्देशक डा पुकार श्रेष्ठसँग छलफल गरेको बताउँछिन् । 

गत  वैशाख ११ गतेदेखि केन्द्रका नर्सहरू विरोधमा उत्रिएका छन् । यसअघि उनीहरू कहिले स्वास्थ्य तथा जनसंख्या मन्त्रालयमा त कहिले नर्सिङ संघ नेपालमा प्रदर्शन गरेका थिए  । तर समस्याको समाधान गर्न कुनै पनि पक्षले चासो नदेखाएपछि अनसन सुरु गर्नु परेको नर्सहरुले बताएका छन् ।

यस्ता छन् उनीहरुका माग

पुरानो कर्मचारीको कार्यसम्पादन मूल्यांकनका आधारमा ग्रेडिङ गरिनुपर्ने  
पुराना कर्मचारीलाई स्थायी गरिनुपर्ने ।
प्रत्यारोपण केन्द्रका नर्सहरुलाई समयमै तलब दिनुपर्ने ।
ठेकेदार प्रक्रिया हटाएर कार्यरत सम्पूर्ण कर्मचारीहरुलाई अस्पतालले नै तलबको व्यवस्था गर्नुपर्ने ।
सरकारी अस्पतालमा पाइने सेवा सुविधा उपलब्ध गराउनु पर्ने  ।

सांकेतिक तस्बिर

प्रतिकृया दिनुहोस
ad