काठमाडौं । प्रहरीले चोरीमा संलग्न भएको आरोपमा एक पाकिस्तानी दम्पतीलाई पक्राउ गरेको छ । महानगरीय अपराध महाशाखाको टोलीले राहदानी नं. क्यूडब्लू ४१०२६४३ वाहक मोसिन खान र एइ ०११०९४३ वाहक पूजा मोसिन खानलाई चोर्दाचोर्दै पक्राउ गरेको हो । 

अपराध महाशाखाका वरिष्ठ प्रहरी उपरीक्षक (एसएसपी) सहकुलबहादुर थापाले २९ वैशाखमा भक्तपुरको सूर्यविनायकमा उनीहरुले आर इलेट्रोनिक्समा चोरी गरेका थिए । आर इलेट्रोनिक्सका सञ्चालक रामकृष्ण श्रेष्ठले भने, ‘‘पसलमा सामान हेर्न आएका उनीहरुले नेपाली हजारको नोट कस्तो हुन्छ हेरौं भनेर मागे । विदेशीले हेर्न मागेको होला सोचेर दिँदा त गन्ने बहानामा हातबाट पैसा चोरेर भागेको पाइयो ।’’ उनीहरु राम्रो ‘गेटअप’मा भाडामा कार लिएर हिँड्ने गरेको पाइएको छ । महाशाखाका एसएसपी थापाका अनुसार श्रीमान् श्रीमतीसँगै उनीहरुका छोरा–छोरीसमेत नेपाल आएका थिए । यसअघि उनीहरुले बुटवलमा समेत चोरी गरेको पाइएको छ ।

उनीहरुले रुपन्देही पुगेर पनि राइजिङ स्पोर्टस् ग्यालरीबाट पनि १ लाख ५० हजार रुपैयाँ चोरीको प्रयास गरेका थिए । उनीहरुले प्रयोग गरेको बा १९ च ७४ नम्बरको समेत प्रहरीले नियन्त्रणमा लिएको छ ।

र्यविनायकमा चोरी गरी लोकन्थलीमा समेत चोरी गरेर भाग्दै गर्दा पिछा गरेर विमानस्थल क्षेत्रबाट उनीहरुलाई पक्राउ गरेको थापाले बताए । उनीहरुको साथबाट ५० दरका १७ र एक सय दरका २१ थान अमेरिकी डलर, पाकिस्तानी मुद्रा ८ सय र नेपाली रुपैयाँ एक लाख ३७ हजार ५ सय बरामद भएको छ । उनीहरु एक महिना अघिमात्रै पर्यटक भिसामा नेपाल प्रवेश गरेका थिए । उनीहरुबारे थप अनुसन्धान भइरहेको महाशाखाले जनाएको छ ।

हेर्नुस्, ठगी गर्दै गरेको भिडियो