काठमाडौ । महिला फ्रेन्चाइज क्रिकेट लिग ‘वुमन्स च्याम्पियन्स लिग’को खेलाडी ड्राफ्ट मंगलबार (आज) हुने भएको छ । आयोजक क्विन्स ईभेन्ट म्यानेजमेन्टले आज साँझ होटल सांग्रिलामा खेलाडीको ड्राफ्ट गर्ने भएको हो ।
डायमण्ड, रुबिज, सफायर्स र वाइल्ड कार्ड ईन्ट्री गरी चार समूहमा खेलाडी विभाजनागरेको आयोजकले जानकारी दिएको छ । डायमण्डका लागि ७५ हजार, रुबिजका लागि ५० हजार, सफायर्सका लागि २५ हजार रुपैयाँ राखिएको छ ।
जस अन्तर्गत राष्ट्रिय टिमबाट अन्तरराष्ट्रिय प्रतियोगिता खेलेका हालका सदस्यलाई डायमण्ड श्रेणीमा, उमेर समूहका राष्ट्रिय प्रतियोगिता खेलेका खेलाडी रुबिजमा हुनेछन् भने सफायर्समा घरेलु टिमबाट राष्ट्रिय प्रतियोगिता खेलेका खेलाडीलाई राखिएको छ । यस्तै ट्यालेन्ट हन्टबाट आउने खेलाडीलाई वाईल्ड कार्ड ईन्ट्रीमार्फत प्रतियोगितामा समावेश गरिनेछ ।
खेलाडीको संख्या कम भएका कारण अक्सन नगरेको आयोजकले टिमका मालिकले लक्कि ड्र मार्फत् प्राप्त गर्ने नम्बरका आधारमा खेलाडी छनोट गर्नेछन् । प्रतियोगिता असोज ३ गतेबाट ११ गतेसम्म त्रिवि क्रिकेट मैदान कीर्तिपुरमा आयोजना हुनेछ ।