काठमाडौं । कतार च्यारिटी र कतार एयरवेजको सहकार्यमा काठमाडौंका दुई सय विपन्न परिवारलाई खाद्यान्न सामग्री वितरण गरिएको छ ।
‘रमजान फुड प्याकेट डिस्ट्रिब्युसन’ कार्यक्रम अन्तर्गत गरीब, विधुवा, अनाथ, असहाय पीडित परिवारलाई प्रतिपरिवार २५ केजी चामल, ५ केजी पिठो, ३ केजी चना, ३ केजी चिनी ,५ लिटर तेल र १ केजी नुन सहितको खाद्यान्न सामग्री वितरण गरिएको हो ।
अरेबिक क्यालेन्डरको रमजान महिना पुण्य कमाउने अवसर हो । यस महिनामा विशेषगरि मुस्लिम समुदायका संघ संस्था तथा व्यक्तिहरुले सकेसम्म धेरै सामाजिक कार्य गर्ने गर्दछन् ।
कतार च्यारिटी नेपालका परियोजना प्रबन्धक इर्शाद अलि शेखले खाद्यान्न सामग्रीले विपन्न परिवारका केहि आवश्यकता भए पनि पुरा हुने बताए । कार्यक्रममा कतार एयरवेजका ‘कन्ट्रि म्यानेजर’ मोहम्मद अल इमामका साथै कतार च्यारिटीका अब्दुल अजीज अलथानीको उपस्थिति रहेको थियो ।
कतार च्यारिटीले विगत दुई वर्षदेखि नेपालको शिक्षा, स्वास्थ्य, खानेपानी र सरसफाईको क्षेत्रमा काम गर्दै आएको छ । च्यारिटीले शिक्षा क्षेत्रमा अनाथ तथा कमजोर आर्थिक अवस्था भएकालाई छात्रवृत्ति, अस्पताललाई उपकरण सहयोग, विद्यालयहरुमा चर्पीलगायतका आवश्यक पूर्वधार निर्माण, कमजोर आर्थिक अवस्था भएकालाई विभिन्न प्रकारका आर्थिक सहयोग गर्दै आएको छ ।