काठमाडौं । पहिलो पटक हुन लागेको गायन प्रतियोगिता ‘नेपाल लोक स्टार’ जेठ २५ गतेबाट प्रशारण हुने भएको छ । सातवटै प्रदेशमा अडिशन सम्पन्न गरेर मेगा अडिशनको तयारीमा रहेको आयोजकका अनुसार जेठ २५ गतेबाट दर्शकले एपीवान एचडीबाट ‘नेपाल लोक स्टार’ हेर्न सक्ने छन् ।
“प्रशारण मिति तय भयो, अहिले मेगा अडिशनको तयारीमा छौं । सेट बनिरहेको छ, जेठ १० गतेबाट मेगा अडिशन सुरु हुन्छ्,” आयोजक चाहना मिडियाका अध्यक्ष सहदेव कोइरालाले भने ।
३१ वटा श्रृंखला प्रशारण हुने कार्यक्रम एपीवान एचडी टेलिभिजनबाट प्रशारण हुनेछ । ३२ औं श्रृखंला फाइनल हुनेछ ।
विजेताले करसहित नगद रु ५० लाख रुपैयाँ पाउने छन् । आयोजकका अनुसार दोस्रो हुनेलाई २५ लाख (करसहित) र तेस्रो हुनेलाई १० लाख रुपैयाँ (करसहित) पुरस्कार प्रदान गरिने छ ।
‘नेपाल लोक स्टार’को निर्णायकमा जयनन्द लामा, सुनिता दुलाल, रामजी खाँड र बिबि अनुरागी छन् ।