काठमाडौं । अमेरिका लैजाने भन्दै नक्कली विवाहको नाटक गरेका शशीधर खड्काले अर्की एक महिलाको घरबार नै बर्बाद गरेको पाइएको छ । खड्काले ललितपुरकी एक विवाहित महिलालाई अमेरिका लैजाने भन्दै डिभोर्स गर्न लगाएर अलपत्र पारेका हुन् ।
आफ्नो फरक–फरक नाम बताएर ठगी गर्दै हिँडेका शशीधर खड्कामाथि महानगरीय प्रहरी परिसर काठमाडौंले अनुसन्धान गरिरहेको छ । परिसर काठमाडौंका डिएसपी होमिन्द्र बोगटी भन्छन्, ‘‘शशीधर खड्काको काम नै महिलालाई निसाना बनाएर ठग्ने गरेको पाइएको छ । लामो समयदेखि उनले दलाली गर्दै कयौंको घरबार बिगारेका पनि रहेछन् । उनीविरुद्ध उजुरी आउने क्रम जारी छ ।’’
युवती फकाउने शशीधरको कला
शशीधर खड्का पहिले कसलाई फसाउन सकिन्छ भनेर योजना बनाउँछन् । योजना बनाएपछि फसाउने महिलाको सबै नालीबेली पत्ता लगाउँछन् । नालीबेली वा कमजोरी पत्ता लगाएपछि दोस्तीको हात अघि बढाउँछन् । त्यही क्रममा काठमाडौं दरबारमार्गस्थित एक क्लबमा शशीधर नियमित आउ–जाउ गर्र्न थाले । क्लब जाँदै गर्दा शशीधरको एक महिला लक्ष्मी श्रेष्ठ (नाम परिवर्तन) सँग दोस्ती हुन्छ । क्लब आउँदै–जाँदै गर्दा दोस्ती बढ्दै जाँदा शशीधरले ती महिलालाई आफूसँगै अमेरिका लैजाने प्रस्ताव गर्छन् ।
तर लक्ष्मी विवाहित थिइन् भने उनका आमाबुबा दुवै अमेरिका थिए । लक्ष्मीको भारतीय नागरिकसँग विवाह भएपनि उनी ललितपुरमै बस्थिन् । विवाहित भएकाले लक्ष्मीलाई अमेरिकाको प्रस्ताव स्वीकार्य भएन । तर, एक हप्तामै आफूसँगै अमेरिका लैजाने आश्वासन देखाएपछि लक्ष्मीले अमेरिकामा रहेका आमाबाबुसँग कुरा गरिन् ।
शशीधरले अमेरिका जाने भए श्रीमान्सँग डिभोर्स गर्ने प्रस्ताव राखे । त्यतिबेलासम्म शशीधर लक्ष्मीको घरमा आउने–जानेसम्मको दोस्तीमा थिए । शशीधर लक्ष्मीसँग ‘लिभिङ टुगेदर’ मा बस्न थाले । शशीधरले बिहे गरेर आफैसँग अमेरिका लैजाने भनेपछि लक्ष्मीले श्रीमान्सँग डिभोर्स गरिन् । श्रीमान्सँग डिभोर्स गरेपछि लक्ष्मीले आफ्नो संसार नै शशीधरलाई देख्न थालिन् । त्यसपछि शशीधरले रकम माग्न थाले ।
लक्ष्मीसँग नगद ९ लाखमात्रै थियो । उनले आफ्ना सबै गहना बेचेपछि २४ लाख पुग्यो । शशीधरले सबै रकम पाइसकेपछि एकाएक सम्पर्कविहीन भए । शशीधर खड्काले लक्ष्मीलाई आफ्नो वास्तविक नाम बताएका थिएनन् । जब शशीधर लामो समयसम्म पनि सम्पर्कमा आएनन्, लक्ष्मीले ठगिएको चाल पाइन् । तर शशीधरले रकममात्रै लुटेनन्, लक्ष्मीको घरबार नै वर्वाद गरेको उनका आफन्त बताउँछन् । शशीधरविरुद्ध ठगि र जवरजवस्ती करणीमा मुद्दा चलाएर प्रहरीले अनुसन्धान गरिरहेको छ ।
त्यसअघि शशीधरले काठमाडौं थानकोटकी एक युवतीसँग विवाह गरी अमेरिका लैजाने भन्दै ४२ लाख रुपैयाँ ठगी गरेका थिए । परिसर काठमाडौंका डिएसपी होमीन्द्र वोगटीका अनुसार उनलाई झण्डै तीन महिनाको प्रयासपछि समातिएको हो । १२ कक्षामा अध्ययनरत एक किशोरीलाई विवाह गरेर अमेरिका लगिदिने प्रलोभनमा ४२ लाख रुपैयाँ असुल गरेका थिए उनले । छोरी अमेरिका जाने प्रलोभनमा परेपछि अभिभावकले घर बैंकमा राखेर रकम जुटाएका थिए ।