वास्तविक नाम शशिधर खड्का तर अपराध र ठगिको दुनियाँमा उनको नाम कहिँ गुलाब खड्का, कहिँ सुवास खड्का, कहिँ विजय थापा त कहिँ पारस खड्का । आकर्षक गेटअप । चढ्नलाई राम्रो कार । पहिलो भेटमै आफूतिर तान्नसक्ने गज्जबको कला ।
यतिबेला उनी महानगरीय प्रहरी परिसरको हिरासतमा छन् । काठमाडौं थानकोटकी एक युवतीसँग विवाह गरी अमेरिका लैजाने भन्दै ४२ लाख रुपैयाँ ठगी गरेको आरोपमा उनी पक्राउ परेका हुन् । परिसर काठमाडौंका डिएसपी होमिन्द्र वोगटीका अनुसार उनलाई झण्डै तीन महिनाको प्रयासपछि समातिएको हो । १२ कक्षामा अध्ययनरत एक किशोरीलाई विवाह गरेर अमेरिका लगिदिने प्रलोभनमा उनले ४२ लाख रुपैयाँ असुल गरेको पीडितको भनाइ छ । छोरी अमेरिका जाने प्रलोभनमा परेपछि अभिभावकले घर बैंकमा राखेर रकम जुटाए । तर, रकम लिएर खड्का गायब भएपछि मात्रै किशोरी र परिवारले ठगिएको चाल पाए ।
ठग्नकै लागि विवाहदेखि यौन शोषणसम्म
थानकोट घर भएकी जानकी शाही (नाम परिवर्तन) केही कामले पाटन अदालत जान्थिन् । ती किशोरीलाई शशीधरले लामो समयसम्म पिछा गरे । उनले ती युवतीको सबै विवरण प्राप्त गरेपछि अदालतमा चिनजान गर्न खोजे । चिनजानका क्रममा उनले आफू ती युवतीको बुवाको साथी भएको बताए । जानकीका बुबाको सशस्त्र द्वन्द्वका क्रममा ज्यान गएको थियो । बुवाको चिनजानको साथी भनेपछि उनले राम्रैसँग कुराकानी गरिन् । परिचयका क्रममा खड्काले किशोरीलाई अमेरिकाबाट आएको बताए ।
जानकी र शशीधरको दोस्ती भयो । विस्तारै फोनमा कुराकानी र भेटघाट हुन थाल्यो । जानकी भन्छिन्, ‘‘मेरो जिन्दगी नर्क बनाउने राक्षसलाई चिन्न सकिनँ । आफ्नो ठानेर सबै सुम्पिएँ । तर आज घर न घाटकी भएँ ।’’ दोस्ती बढ्दै गएपछि शशीधर जानकीको घरसम्म पुग्न थालेका थिए । घरमा जानकी, उनकी आमा र दिदीमात्रै बस्दै आएका थिए । जानकीकी आमा र दिदीसँग पनि शशीधरले मित्रता बढाए । मित्रता बढाउँदै गएपछि उनले आफू अविवाहित भएको र जानकीसँग विवाह गरेर अमेरिका लैजाने प्रस्ताव सुनाए । जानकीकी आमाले भनिन्, ‘‘शशिधरले म परराष्ट्र मन्त्रालयका हाकिमको मान्छे हो भन्यो । म पाँचजनालाई अमेरिका लैजान सक्छु, ४२ देखि ४५ लाखसम्म लाग्छ । जानकीलाई म विवाह गरेर लैजान्छु, दिदी जानेभए ४२ लाख रकम जुटाउनुपर्यो भन्यो ।’’ विवाहदेखि अमेरिकासम्मको प्रस्ताव आएपछि जानकीको परिवार राजी भयो । जानकी भन्छिन्, ‘‘शशीधरले विवाह सामान्य रुपमा गरौं, किन धुमधाम गर्ने भनेपछि घरमै सामान्य विवाह गर्यौं । उसले एक तोलाको औठीं मेरो औंलामा लगाइदियो ।’’
विवाह भएपछि शशीधरले जानकी र उनकी दिदीको नागरिकता, शैक्षिक योग्यताको प्रमाणपत्र लिए । आफैसँग लगेर पासपोर्ट पनि बनाइदिए । ज्वाइँ नै भइसकेका शशीधरले जानकीको परिवारलाई अमेरिकाबाट पैसा मगाएको तर केही ढिलो हुने भएकाले पैसा जुटाउन भने । ‘‘ज्वाइँले नै त्यसो भनेपछि बैंकमा घर राखेर पैसाको जोहो गर्यौं । त्यसपछि पटक–पटक गरेर ४२ लाख रकम दियौं,” जानकीकी आमाले भनिन् ।’’
रकम पाएपछि खड्का एकाएक बेपत्ता भए । खड्काको मोबाइल लाग्न छाडेपछि परिवारले ठगिएको चाल पाए । त्यसबीचमा विवाह गरे पनि शशीधरले जानकीलाई आफ्नो घर पनि लगेका थिएनन् । जानकीलाई पारस खड्का नाम बताइएको थियो ।
महानगरीय प्रहरी परिसर काठमाडौंका प्रवक्ता डिएसपी बोगटीले भने, ‘‘युवतीलाई झुटा सपना देखाएर पटक–पटक यौन शोषण गरिएको छ, ठगिएको छ । त्यसैले खड्काविरुद्ध ठगी र जबरजस्ती करणीको मुद्दा दायर गरेका छौँ ।’’ खड्काविरुद्ध थप अनुसन्धान जारी रहेको उनले बताए ।
पहिचान लुकाएर पाँच विवाह
प्रारम्भिक अनुसन्धानका क्रममा शशीधरले पहिचान लुकाएर पाँचवटा विवाह गरेको खुलेको छ । उनको वास्तविक घर प्यूठान रहेको खुलेको छ । डिएसपी बोगटीले भने, ‘‘उनले हामीसँग अविवाहित नै भनेका छन् । तर, प्यूठानमा एक छोरा, छोरी र श्रीमती भएको खुलेको छ । अन्य पाँच विवाह गरेको कुरा पनि आएको छ ।’’
उनले महिलालाई नै मुख्य निसाना बनाउँदै ठग्दै गरेको खुलेको बोगटीले बताए । परिसर काठमाडौंमा खड्काविरुद्ध तीनजनाले उजुरी दिएका छन् । बोगटीले भने, ‘‘सोझा महिलालाई शोषण पनि गर्ने र पैसा पनि कुम्ल्याउने शशीधरको धन्दा नै रहेछ । यसबारे विस्तृत अनुसन्धान गरिरहेका छौं ।’’
शशीधरले अन्य महिलालाई पनि ठगेको बताइएको छ । डिएसपी वोगटीका अनुसार शशीधरको समूहमा रहेका अन्य व्याक्तिमाथि समेत अनुसन्धान सुरु गरिएको छ ।