काठमाडौं । दोस्रो संस्करणको चन्द्रागिरी गोल्डकप फुटबल प्रतियोगिताको उपाधिका लागि च्यासल युथ क्लब र सरस्वती क्लब भिड्ने भएका छन् ।
आज भएको दोस्रो सेमिफाइनलमा च्यासलले विभागिय क्लब एपिएफमाथि जित निकालेसँगै उपाधिका लागि सरस्वती र च्यासल भिड्ने पक्का भएको हो ।
चन्द्रागिरी नैकापस्थित नैकाप फुटबल मैदानमा च्यासलले एपीएफमाथि २–१ को कठिन जित निकालेको हो । च्यासललाई फाइनलमा पुर्याउन विदेशी खेलाडी अर्मान्डले दुवै गोल गरे । एपीएफका प्रदीप लामाले एक गोल फर्काएपनि टोलीलाई विजय बनाउन सकेनन् ।
रोमाञ्चक र प्रतिस्पर्धात्मक बनेको खेलको २६औं मिनेटमा च्यासलले अर्मान्डको गोलबाट अग्रता लिएको थियो । कप्तान अमिर श्रेष्ठको पासमा अर्मान्डले अफ साइड बिट ट्याप गर्दै हेडमार्फत गोल गरेका थिए । तर, च्यासलको त्यो अग्रता लामो समय टिकेन । ३३औं मिनेटमा प्रदीप लामाले बराबरी गोल फर्काए । सन्तोष श्रेष्ठको क्रसमा प्रदीपको पहिलो प्रहारलाई च्यासलका गोलरक्षक दिनेश थापामगरले रोकेपनि प्रदीपको दोस्रो प्रयास बाउन्स हुदै गोलमा परिणत भएको थियो ।
पहिलो हाफ १–१ गोलको बराबरीमा सकिएपनि दोस्रो हाफको अन्तिम समयमा अर्मान्डले व्यक्तिगत दोस्रो गोल गर्दै च्यासलको फाइनल यात्रा तय गरेका हुन् । च्यासलले अब उपाधिका लागि आइतबार सरस्वती युवा क्लबसँग खेल्नेछ । सरस्वतीले जावलाखेलमाथि १–० को जित निकालेको थियो ।
प्रतियोगिताको विजेताले ६ लाख तथा उपविजेताले ३ लाख रुपैयाँ प्राप्त गर्ने आयोजकले जनाएको छ । प्रतियोगिताको उत्कृष्ट खेलाडी र सर्वाधिक गोलकर्ताले समान ३० –३० हजार रुपैयाँ पाउनेछन् ।