काठमाडौं । राष्ट्रपति विद्यादेवी भण्डारीले शुक्रबार संघीय संसदमा आर्थिक वर्ष २०७६-०७७ को नीति तथा कार्यक्रम सार्वजनिक गर्ने क्रममा 'मेरो सरकार' सम्बोधन गरेको भन्दै विवेकशील नेपाली दलले आपत्ति जनाएको छ ।

विवेकशील नेपालीले शुक्रबार एक प्रेस विज्ञप्ति जारी गर्दै सरकार कुनै व्यक्तिको मात्रै नभएको भन्दै आपत्ति जनाएको हो । विज्ञप्तिमा भनिएको छ, "नेपालको संविधानको धारा २ बमोजिम सार्वभौमसत्ता र राजकीयसत्ता नेपाली जनतामा निहित रहेको स्पष्ट छ । शुक्रबार आगामी वर्षका लागि सरकारको नीति तथा कार्यक्रम प्रस्तुत गर्ने क्रममा राष्ट्रपति विद्यादेवी भण्डारीले पटक-पटक ‘ मेरो सरकार ’ भनेर सम्बोधन गर्दा मुलुकको सार्वभौमसत्ता र राजकीयसत्ता नेपाली नागरिकमा नभई आफूमा निहित रहेको सन्देश दिन खोजेको देखिएको छ  । राष्ट्रपतिले यसरी सम्बोधन गर्नु अत्यन्त गैरजिम्मेवार र संवैधानिक मान्यता विपरीत रहेको विवेकशील नेपाली दलको ठहर छ ।"

मुलुक सङ्घीय लोकतान्त्रिक गणतन्त्रमा गइसकेको परिवेशमा समेत राजतन्त्रकालीन झल्को दिने गरी आएको यो सम्बोधनले केपी ओली नेतृत्वको सरकारप्रति गम्भीर आशंका उब्जाएको विवेकशील नेपालीले जनाएको छ । राष्ट्रपति नेपाली जनताबाटै चुनिएर बनेको संस्था हुँदा राजतन्त्रको यतिसम्म भद्दा नक्कल गर्नु आवश्यक नभएको टिप्पणी गरिएको छ ।

"विवेकशील नेपाली कुनै एक व्यक्तिको नभई नागरिकको सरकारमा विश्वास गर्दछ । अत: यस गम्भीर घटनाको सत्य तथ्य छानबिन गरी राष्ट्रपतिबाट `मेरो सरकार´ भनाउन भूमिका खेल्नेहरूको बारेमा यथार्थ प्रकाशमा ल्याउन हामी नेपाल सरकार समक्ष माग गर्दछौँ ।"

नेपालको संविधानको धारा ६१(४) ले स्पष्टसँग राष्ट्रपति संविधानको पालन र संरक्षण गर्नु प्रमुख कर्तव्य हुनेछ भनेको सन्दर्भलाई समेत मनन गर्दै राष्ट्रपति जस्तो संस्थालाई विवादमा ल्याउने कार्य नगर्न सरकारलाई खबरदारी समेत गर्ने विवेकशील नेपालीको विज्ञप्तिमा उल्लेख छ ।

विज्ञप्तीमा भनिएको छ, "राष्ट्रपतिको पद तथा संस्थालाई व्यक्ति र दलीय घेरा भन्दा माथि उठ्न, नेपाली माटो सुहाउँदो व्यवहार प्रदर्शन गर्न तथा संविधान मातहत रहन समेत विवेकशील नेपाली दल यसै विज्ञप्ति मार्फत जोडदार माग गर्दछ । यदी  नियतवश नै सार्वभौमसत्ता र राजकीयसत्ता एक व्यक्तिमा निहित गर्न कसैले खोजेको हो भने लोकतन्त्र र स्वतन्त्रताप्रेमी नागरिकहरू एकजुट भएर नेपालमा सही अर्थमा `नागरिकको सरकार´ स्थापना गर्नुपर्ने आवश्यकतातर्फ पनि हामी सम्बन्धित सबैको ध्यानाकर्षण गराउछौं ।"