काठमाडौं । जावलाखेलमाथि रोमान्चक नतिजा निकाल्दै सरस्वती युवा क्लब चन्द्रागिरी गोल्डकपको फाइनलमा पुगेको छ ।
बिहीबार भएको सेमिफाइनलमा सरस्वती उपहार गोलबाट फाइनलमा पुगेको हो । सरस्वतीले अब उपाधिका लागि एपीएफ र च्यासलबीचको विजेतासँग प्रतिस्पर्धा गर्नेछ ।
चन्द्रागिरी नैकापस्थित नैकाप फुटबल मैदानमा खेल सुरु भएको २ मिनेटमा नै सरस्वतीले उपहार गोलबाट अग्रता बनाएको थियो । जावलाखेलका गौतम श्रेष्ठले गोलरक्षक अरुण तामाङसँग तालेमेल नमिल्दा आफ्नै पोस्टमा गोल गरे ।
गौतमले ब्याकपास दिदा गोलरक्षक पोजिसन बाहिर रहेका थिए । सुरुवातमै आत्मघाती गोलपछि दबाबमा परेको जावलाखेल बाँकी समयमा फर्किन नसक्दा सरस्वती भाग्यमानी बनेको हो ।
सरस्वतीका ओको बोता म्यान अफ दि म्याच घोषित भए । उनले ५ हजार रुपैया पाए । प्रतियोगितामा शुक्रबार दोस्रो सेमिफाइनलमा विभागीय एपीएफ क्लब र भ्याली च्यासल युथ क्लबबीच प्रतिस्पर्धा हुनेछ ।
८ टोलीको सहभागिता प्रतियोगिताको विजेताले ६ लाख तथा उपविजेताले ३ लाख रुपैयाँ प्राप्त गर्ने आयोजकले जनाएको छ । प्रतियोगिताको उत्कृष्ट खेलाडी र सर्वाधिक गोलकर्ताले समान ३० हजार रुपैयाँ पाउनेछन् ।