काठमाडौं । संस्कृतिविद् सत्यमोहन जोशीको जन्मोत्सव ललितपुर महानगरपालिकाले वर्षैभरी विभिन्न कार्यक्रम गरी मनाउने भएको छ । यही वैशाख ३० गते उनी ९९ वर्ष पूरा भई १०० वर्षमा प्रवेश गर्दैछन् । सोही अवसर पारेर ललितपुर महानगरपालिकाले एक वर्षभर विभिन्न कार्यक्रमहरु आयोजना गरी उनको जन्मशताब्दी महोत्सव मनाउन लागेको हो ।
ललितपुर महानगरपालिकाको दोस्रो नगरसभाको निर्णय अनुसार यसो गर्न लागिएको ललितुर महानगरपालिकाद्वारा जारी वक्तव्यमा उल्लेख छ । २०७६ साल वैशाख ३० गतेबाट कार्यक्रम सुरु गरी २०७७ साल वैशाख ३० गतेसम्म विभिन्न कार्यक्रम आयोजना गरी उनको जन्मशताब्दी महोत्सव मनाउन लागिएको हो ।
जोशीको जन्मशताब्दी महोत्सव मनाउन ललितपुर महानगरपालिकाका मेयर चिरीबाबु महर्जनको संयोजकत्वमा १ सय ११ सदस्यीय समिति गठन गरिएको जनाइएको छ । वैशाख ३० गते उनलाई पाटन मंगलबजारबाट लगनखेल, जावलाखेल हँुदै बाजागाजासहित महानगरपालिकामा लगिने र त्यहाँ राष्ट्रपति विद्यादेवी भण्डारीको उपस्थितिमा जन्मोत्सव मनाइने महानगरपालिकाले जनाएको छ ।
त्यस्तै सोही दिन रक्तदान, दीपावली तथा महानगरपालिका भित्र १०० वर्ष पुगेका वृद्धवृद्धालाई सम्मान पनि गरिने महानगरपालिकाद्वारा प्रेषित वक्तव्यमा उल्लेख छ । सो दिन महानगरपालिका क्षेत्रमा सार्वजनिक विदा पनि दिइने जनाइएको छ ।