काठमाडौं । प्रमुख प्रतिपक्षी दल नेपाली कांग्रेस केन्द्रीय अनुशासन समितिको बैठक आज (आइतबार) बस्दैछ । बिहान ११ बजे पार्टी केन्द्रीय कार्यालय सानेपामा बस्ने बैठकमा समितिमा परेका उजुरीका बारेमा चालिने कदमको विषयमा छलफल हुने छ । 

विभिन्न जिल्लाहरुबाट सिफारिसमा परेका उजुरीका बारेमा छलफल गर्न बैठक बस्न लागेको समितिका संयोजक भीष्मराज आङदम्बेले जानकारी दिए । गत चैत २४ बसेको केन्द्रीय अनुशासन समितिले पार्टी हितविपरीतका गतिवधिमा संलग्न नेता–कार्यकर्ताको नाम सात दिनभित्र उपलब्ध गराउन सबै जिल्ला कार्यसमितिहरुलाई पत्राचार गर्ने निर्णय गरेको थियो । 

अनुशासन समितिमा गत स्थानीय तह, प्रदेशसभा तथा प्रतिनिधिसभा निर्वाचनमा स्वतन्त्र उम्मेदवार भएका र निजका प्रस्तावक र समर्थकका साथै कांग्रेस परित्याग गरी अन्य राजनीतिक दलमा गएका झण्डै चार सय व्यक्तिको नाममा उजुरी परेको छ । 

‘‘आज (आइतबार) देखि उजुरी हेर्छौ । पहिले (रमेश रिजालको संयोजकत्वमा गठित समिति) र अहिले गरी चार सय उजुरी परेका छन् । उजुरी परेका मध्ये विधानले चिन्नेलाई विधानतह र विधानले नचिन्ने उजुरीलाई प्रमाणका आधामा कारबाही अगाडि बढ्छ,’’ केन्द्रीय अनुशासन समितिका संयोजक आङदम्बेले भने । 

समितिमा किशोरसिंह राठौर, देवेन्द्रराज कँडेल, धनराज गुरुङ र उमाकान्त चौधरी सदस्य रहेका छन् । यसअघि नेता रमेश रिजालको संयोजकत्वमा समिति गठन गरिएको थियो । उक्त समितिले एक सय ५४ जनालाई स्पष्टीकरण सोधेको थियो ।