काठमाडौं । विद्यालय, क्याम्पसललगायतका शैक्षिक संस्थाहरुमा हुन सक्ने सम्भावित अभद्र व्यवहार तथा हैरानीका घटनाहरु रोकथामका लागि नेपाल प्रहरीले नयाँ कार्यक्रम ल्याएको छ ।
‘समुदाय-प्रहरी साझेदारी’ अवधारणाअन्तर्गत नयाँ शैक्षिक सत्रलाई लक्षित गरी शुक्रबारदेखि शैक्षिक वातावरणमा हुनसक्ने अभद्र व्यवहार र हैरानीविरुद्धको अभियान सुरू गरेको हो । प्रदेशस्तरीय सुरक्षा गोष्ठीको सिलसिलामा २ नम्बर प्रदेश जनकपुरमा रहेका प्रहरी महानिरीक्षक सर्वेन्द्र खनालले भिडियो कन्फेरेन्सको माध्यमबाट काठमाडौंको किष्ट कलेजमा आयोजित कार्यक्रमलाई सम्बोधन गरी राष्ट्रव्यापी रुपमा अभियानको घोषणा गरे ।
खनालले समाजमा अपराध रोकथाम र नियन्त्रण गर्न तथा सुरक्षा सचेतना अभिवृद्धि गर्नको लागि समुदाय र प्रहरीको सहकार्य र साझेदारीको विकल्प नरहेको धारणा व्यक्त गरे । शैक्षिक वातावरणमा हुने कुनै पनि प्रकारका अभद्र व्यवहार तथा हैरानीका सम्भावनालाई रोकथाम गरी बालबालिकाको सिकाई र विकासको आदर्श वातावरण तयारका लागि अभियान सुरु गरिएको खनालले बताए । ‘‘स्कुलभित्र र बाहिरको समेत वातावरण सुरक्षित बनाउन प्रहरीले कुनै पनि कसर बाँकी राख्दैन । यसको लागि प्राज्ञिक क्षेत्रसँग सहकार्य गरेर योजनाबद्ध रुपमा अगाडि बढ्छौं", खनालले भने ।
कार्यक्रममा प्रहरी केन्द्रीय प्रवक्ता प्रहरी वरिष्ठ उपरीक्षक उत्तमराज सुवेदीले समुदाय-प्रहरी साझेदारीको अवधारणा र विकासको औचित्यबारे जानकारी गराए । पछिल्लो समयमा देखिएका अपराधको प्रवृतिको बारेमा चर्चा गर्दै उनले सामाजिक विचलन, विकृति र विसंगति सुरक्षा व्यवस्थापनको चुनौतिको रुपमा देखा परेको दाबी गरे ।
शैक्षिक वातावरणमा हुनसक्ने अभद्र व्यवहार र हैरानीविरुद्धको अभियान कार्यान्वयनको लागि नेपाल प्रहरीले शैक्षिक सत्रको प्रारम्भमै वैशाख-जेठ महिनाभर हरेक विद्यालयहरुमा पुगी समुदाय र विद्यालयहरु समेतको साझेदारीमा विभिन्न कार्यक्रम गर्नेछ ।
यस्ता छन्, प्रहरीले गर्ने कार्यक्रम
विद्यालय र कलेज प्रशासन र प्रहरी-विद्यालय सम्पर्क समितिका सदस्य (छात्र, छात्रा) तथा कक्षागत मनिटरहरुको सक्रियता र साझेदारीमा जनचेतनामुलक कार्यक्रमहरु सञ्चालन गर्ने ।
सबै विद्यालयरकलेज (मेडिकल, ईञ्जिनियरिङ्ग अध्ययन संस्थाहरुमा समेत) का सूचना पाटीहरुमा प्रहरी प्रधान कार्यालयबाट निर्माण गरिएको जनचेतना मुलक पोष्टर टाँस्ने ।
बिहानीको प्राथना सभामा स्वयं प्रहरीको उपस्थितिमा विद्यार्थीहरुबाट जनचेतनामुलक जानकारी वाचन गर्ने ।
अन्तरक्रियात्मक प्रवचनहरु सञ्चालन गर्ने ।
शिक्षक र अभिभावकहरुमा समेत पर्चा, पम्प्लेट वा समुदाय-प्रहरी साझेदारीको अवधारणाले निर्दिष्ट गरेका अन्य माध्यमहरुबाट सचेतना अभिवृद्धि गर्ने ।
छात्राहरु लक्षित हिंसा तथा साइबर अपराधको बारेमा समेत सचेतना अभिवृद्धि गर्ने ।