काठमाडौं । एएफसी यू–१९ महिला च्याम्पियनसिप छनोट दोस्रो चरण अन्तर्गत पहिलो खेलमा नेपाल आज अष्टे«लियासँग खेल्दैछ । बलियो दाबेदार मानिएको अष्ट्रेलियाविरुद्ध उत्कृष्ट प्रदर्शन गर्ने लक्ष्यसहित नेपाल अष्ट्रेलियासँग खेल्न लागेको हो ।
म्यानमारस्थित मन्डलाथिरी रंगशालामा खेल नेपाली समयअनुसार दिउँसो ३ः१५ बजे सुरू हुनेछ । चीनमा दुई मैत्रीपूर्ण खेलपछि नेपाल छनोट खेल्न म्यानमार पुगेको हो ।
आफूभन्दा फिफा वरियतामा ९७ स्थानमाथि रहेको अष्ट्रेलियाविरुद्ध नेपालको लक्ष्य आक्रामक फुटबल खेल्ने हो । नेपाल १ सय ३ औं स्थानमा रहँदा अष्टेलिया ६ औं स्थानमा छ । समूह ए मा रहेको नेपालले अष्ट्रेलियापछि घरेलु टोली म्यानमार र उज्वेकिस्तानसँग प्रतिस्पर्धा गर्नेछ । समूह बी मा दक्षिण कोरीया, भियतनाम, इरान र लेबनान छन् ।
दुबै समूहको शीर्ष २ मा रहने टोली एएफसी च्याम्पियनसिपमा छनोट हुनेछ । नेपालले गत कात्तिकमा थाइल्याण्डमा सम्पन्न पहिलो चरणमा उत्कृष्ट उपविजेता बन्दै दोस्रो चरणको यात्रा तय गरेको थियो ।
