पोखरा । लमजुङको पर्यटकीय गाउँ घलेगाउँलाई रातो जस्तापाता किन्न गण्डकी प्रदेश सरकारले २९ लाख रुपैयाँ दिने भएको छ । बुधबारको मन्त्रिपरिषद् बैठकको निर्णयानुसार पर्यटन प्रवद्र्धन गर्न भन्दै उक्त रकम दिइने भएको हो ।
सरकारका प्रवक्ता तथा भौतिक पूर्वाधार विकासमन्त्री रामशरण बस्नेतले ५० प्रतिशत अनुदान दिने गरी २९ लाख २७ हजार रुपैयाँ दिने भएको बताए । “एउटै रंगको गाउँ बनाउन सरकारले सहयोग गर्ने भएको हो,” उनले भने । घलेगाउँका अहिले गुरुङ बसोबास रहेको ८० र दलित बसोबास रहेको ४५ गरी १२५ वटा घर छन् । कालो जस्ताले छाइएका यी घरहरुमा रातो जस्ता लगाउन सरकारले सहयोग गर्ने निर्णय गरेको हो । घलेगाउँ क्होलासोथर गाउँपालिका ३ मा पर्दछ । गाउँपालिकाका अध्यक्ष प्रेम घलेले घलेगाउँलाई रातो जस्ताले रंग्याउन ७५ लाख खर्च लाग्ने जनाए । उनले भने, “सके यही चालु आर्थिक वर्षमा नसके अर्को वर्षभित्र सबै घरहरु जस्ताले छाउनेछौँ ।”
त्यसो त यो वडामा मात्र कुल २ सय ५५ घरहरु छन् । प्रायः घरहरु थरिथरिका ढुंगाले छाइएका छन् । गत असारमा गाउँसभाले पारित गरेको चालु आर्थिक वर्षको नीति तथा कार्यक्रममा नै यो योजना समेटिएको घलेको भनाइ छ । “हामीले गाउँसभाबाटै पारित गराएका हौँ, सके यो वर्ष नसके अर्को वर्ष ढुंगाको छाना हटाएर रातो जस्ताले छाना छाउनेछौँ,” उनले भने । दुईवटा छाना हुने घरमा चाहिँ यो वर्ष एउटा छानामात्र परिवर्तन गरिनेछ ।
यस्तै, मन्त्रिपरिषद्ले भौतिक पूर्वाधार विकास मन्त्रालय मातहत रहने गरी दमौली र बाग्लुङमा सडक डिभिजन कार्यालय स्थापना गर्ने निर्णय गरेको छ । यसअघि यी दुवै कार्यालय संघ सरकारको मातहतमा थिए । दुवै कार्यालयमा ३६–३६ जना कर्मचारीको दरबन्दी रहनेछ ।