कोलम्बो । श्रीलंकाको राजधानी कोलम्बोमा भएको ऋंखलावद्ध बम विष्फोटपछि मोहम्मद हसन घरबाट बाहिर निस्केका छैनन् । विष्फोटपछि उत्पन्न तनावको वातावरणमा मुस्लिम भएकै कारण आफूमाथि आक्रमण हुन सक्ने उनमा त्रास छ । ४१ वर्षीय हसन प्रिन्टिङ प्रेसमा नोकरी गर्छन् । तर, उनको परिवार उनलाई घरमै बस्न भनिरहेको छ ।  

डेमाटागोडास्थित जुम्मा मस्जिदमा नमाजका लागि आएका हसनले भने, ‘‘मेरो परिवारलाई म बाहिर निस्कँदा घर फिर्ता हुन्छु कि हुन्न भन्ने डर छ ।’’ गत आइतबार क्रिश्चियन धर्मावलम्बीले ‘ईस्टर सण्डे’ पर्व मनाइरहेका बेला श्रीलंकाका चर्च र तारे होटलहरुमा श्रृंखलावद्ध रुपमा आठ वटा बम विष्फोट भएका थिए । आक्रमणमा परी मृत्यु हुनेको संख्या तीन सय ५९ पुगिसकेको छ । पाँच सयभन्दा बढी घाइते भएका छन् । 

मुस्लिम समुदायका आर एफ अमीरले आफूहरुलाई सुरक्षा चाहिएको बताए । उनले भने, ‘‘हामी अत्यन्तै डराएका छौं । किनकी जसले पनि हामीलाई टोपी लगाएको देख्दा आफ्नो शत्रु सम्झिन्छ । हामी सबैलाई भन्न चाहन्छौं कि हामी कसैका शत्रु होइनौं । यो हाम्रो मातृभूमि हो ।’’  घटनाको मुस्लिम समुदायले पनि निन्दा गरिरहेको छ । तर, मुस्लिम समुदायको ठूलो हिस्सा अहिले पनि डराएको छ । ६० वर्षीय जरीना बेगमले ‘ईस्टर सण्डे’ पछि आफूले सुत्नै नसकेको बताएकी छिन् । गैरमुस्लिम समुदाय मुस्लिम समुदायसँग अत्यन्तै आक्रोशित छ भन्ने बारेमा आफू जानकार रहेको उनको भनाइ छ । 

आक्रमणप्रति आक्रोशित गमजदा बेगम भनिछन्, ‘‘आतंकवादीहरुले आमाको काखमा खेल्दै गरेका बालबालिकालाई पनि छोडेनन् । उनीहरुको मस्तिष्कमा यति घृणा पालिएको रहेछ भन्ने बारेमा म कल्पना पनि गर्न सक्दिन । घृणाको अन्त्य कहिल्यै पनि घृणाबाट गर्न सकिँदैन ।’’ आक्रमणपछि आफ्नो समुदायका सबै मानिसहरु डरले घरबाट बाहिर जान नसकेको उनले बताइन् । 

श्रीलंकाको झण्डै २.१ करोड जनसंख्यामा सिंहाली बौद्ध बहुसंख्यकमा पर्दछन् । त्यसपछि श्रीलंकामा हिन्दू धर्मावलमबीको संख्या दोस्रो नम्बरमा पर्दछ । मुस्लिम धर्मावलम्बीहरुको संख्या १० प्रतिशत आसपास रहेको छ । त्यस्तै श्रीलंकामा झण्डै सात प्रतिशत ईसाइहरु छन् ।  

नवभारतथ टाइम्स